《久別重逢》- 你開心就好

 

梁禮彥的《久別重逢》表面賣法：鄭伊健+陳卓賢+許恩怡，就咁已可叫你以為能男女老少通殺，再把長洲拍到日本鄉郊風情來說好香港故事，兼且多拍校服畫面迎合某国人愛好，似乎定能通街食盡。

若真咁諗你又似太天真：若你係反鏡、又看伊健這白馬王子點都會有老而衰敗一日、或覺許有時嘈到只係另一個顏卓靈，咁樣樣當然對你起不了作用 - 就係那個常言因劣評某套而被追斬九條街的同行，還是吾友Ah mo，都冒著險對這套大窒。

 

同行指這套劇情蒼白，你卻可窒返他雙重標準，因他讚過藤井道人的《青春18×2 通往有你的旅程》- 兩套都係男主角事業失意，女主角身患絕症，去日本都係為療癒自己；其另指穿越手段突如其來沒有鋪排，像石琪評《穿越時空的少女》盲衝亂撞簡直弱智，但正如小弟也講過弱智又如何：穿越本身唔重要，穿越去幹甚麼 - 面對自己，修補遺憾才是重點，就係有限片長，為啥要多用時間解釋唔係重點之事？

 

Ah mo指伊健其實只無病呻吟，頂多只係偶一腦塞就自暴自棄。樽頸係創作人之通病，《深夜食堂》第七十二夜五花肉番茄卷也是講一漫畫家紅不起來就轉返鄉下種田，卻結識到伙伴重拾漫畫。話雖伊健又係「返鄉下」，但其實新作一早已有只係懶係嘢收埋，他本來就唔算跌到谷底，難怪有人窒話佢返來根本沒啥意義。

 

要挑的話還有一點，這戲英文名Last Song For You：亦係山口百惠的引退歌《さよならの向う側》英文譯名，這歌亦給荒井晴彥挪用在《花腐》。諷刺係最後係遺憾得到彌補開花結果而唔係無法挽回，為何要你懶大方Thank you for your everything？若簡單照譯最後一曲給你也奇怪，都話你只係偶然樽頸，咁就最後一首就顯得你無厘頭發皮四唔玩啦收工啦咁，只為你的無病呻吟又添一證。

 

或者你放棄賺盡全世界的傻豬諗法，只令部分人得到滿足就行：橫掂後悔未能彼此好好表達互相的心聲早就講過，就無謂再執口水尾，還不如施個魔法修補遺憾叫對有情人能相擁，話之手段如何無頭無腦，反正有時入戲院就係逃避一下現實，叫你開心就好，不是嗎？

 

參考：Ah mo《久別重逢》

晞。觀影記事 - 久別重逢：唯美影像就能彌補劇情上的不足？