《十方之地》- 係又點唔係又點？

 

黃肇邦《十方之地》(Obedience)，你以為講觀音借庫，畢竟此是開端。但其實如像王全安《白鹿原》：係建築，即觀音廟才是骨幹，鏡頭及後聚焦，都係由廟延伸出去。 

鏡頭由各路借庫人群移向下層：街頭天光墟、執紙皮阿婆、回收業情況、廚餘回收工等。你覺似《窄路微塵》甚或《小菊的世界》，就係會近鏡拍向廚餘，只比糞便觀感好一點。或最大對比係《窄路》定《小菊》都有對白，係「講出」還是要樂觀面對云云；《十方》開頭幾近無言，人們與身邊穿插的都對自己不置可否，像說自己情況縱使旁人望落係唔理想之如此類，但係又點唔係又點？雖然拍下的幾位都有話要說，但對自己情況還是要無奈領受。 

 

無言而無奈唔止係人，更是土地：電影拍攝時間由沙中線興建至建成，鏡頭聚焦的場景在紅磡必嘉街：這位置在紅磡何文田黃埔三鐵路形成之三角帶中間，某香港大地產商拜託一間被港人稱作「玄牛」的去大肆收購該街唐樓，唐樓餘下弱勢居民吐苦水道如何被疑似該公司的人威脅驅趕，土地亦無奈眼白白看著其身上唐樓被拔起，改建一棟棟巨廈，只因「水主宰的地方，土地必須服從」，片尾更講明「水」在廣東話意解作錢。你話土地可大地反撲應付囂張的資本家，例如來場地震或海嘯，問題係香港地理實屬福地。

 

你問資本家還真不可一世？或者黃肇邦只拍到二零一八就完，未能再看到往後：例如下一年，位於紅磡的大學變成戰場。再下一年就係某大法降臨，也如如來神掌般推倒穩如泰山的樓價。那某叔若到必嘉街，望著自己當年高價營建的物業，或也會擺出個「係又點唔係又點」的模樣。