《風流一代》- 賈樟柯殺死賈樟柯

 

賈樟柯自說拍了二十年的《風流一代》(Caught by the Tides)，其實佢自己都自爆：就係當年拍《任逍遙》《三峽好人》時或順手拍多一點，甚至預係已剪走擲埋一邊，依家執返循環再用咁解，只要十多年後趙濤李竺斌健在就可埋尾。講真就算賈發癲到去重建一個快沉沒的奉節，趙也冇力同你裝年輕返去廿幾歲。

 

你或發脾四罵這像拼拼貼貼合埋卻唔知講乜，咁係你太會自尋煩惱，有人指賈蔡明亮化已很大提示：蔡的長鏡頭就係給觀眾自行解讀，無須鑽牛角尖。你覺得賈只在想當年，那就係。頂多只係趙李兩人走過二十年的紀錄片，亦就是。

 

但故事的起承轉合清晰，就係以地方來劃：大同、奉節、珠海、大同 - 《Butterfly》與申奧熱一邊起了燥動欣欣向榮，只係周邊都係掩飾不了的粗糙，並暗暗響起《殺死那個石家莊人》，趙李在此結識、李遠走奉節，趙追到過來，卻又講定還是分手 - 奉節的拆遷，三峽的水漲，講起來轟轟烈烈，但洪流其實也可平靜、李老來遠到珠海，話係想南下淘金，但這互聯網每人一手機時代，你去邊也一樣、李自覺作不慣小丑來這就是娛樂，只可回到大同重遇趙，趙卻在他面前跑起步，似嚷眷戀當年，日子始終還要過。

 

你覺小弟解得像講廢話般沒意思，但小弟敢講這戲的確如此，因有意思的賈不敢講落去：《殺死那個石家莊人》其實只播到「雲層深處的黑暗啊 / 淹沒心底的景觀」，就係唔會反覆激昂唱起「如此生活三十年 / 直到大廈崩塌」- 這大廈講緊咩你知我知單眼佬都知，所以唔敢高呼多兩句。正如講二零二二年十二月某日的大同，人們還排隊做核酸掃健康碼，現實係這些在這時刻已不復存在，只因同年十一月尾，一場大火一張白紙迫出一場革命。怪哉賈樟柯在講甚麼「變革一代」，他明知甚麼才算革命，卻就愈避愈開。你話他只係心裡所想埋藏，但明顯就把《任逍遙》《天注定》的自己活埋，遺下一個平庸的賈樟柯。