幾年前興起的作家執導熱似已退潮，薛可正現在才加入其實有點遲。而且薛講自己的故事係冇問題，但要佢去編新故事才是對他的考驗。
《起底組》 (Keyboard
Warriors) 有《告別之前》等散文式電影的缺點 - 主題主旨不明確，這是薛太貪心之錯：覺得搵了鄧麗欣和陳凱琳就不要當她倆係林耀聲同游學修的花瓶咁浪費，姊妹情和毒撚起底why
not both？問題係你就得八十六分鐘，兩姊妹可以寫得單薄，但重點唔係毒撚起底組咩？又只係單打林游兩人好色戇居逃避現實，鄧月平仲似係嫌女唔夠多亂入，再加埋一堆潮語有理無理硬塞入去
- 簡直係高登大盤菜，似應有盡有但你卻無瑕感受到每道菜的細緻，更冇真誠問過這班起底組毒撚在想甚麼。
《起》和同期西片《人肉搜尋》 (Searching) 有很多共同 - 互聯網、真兇原來係警察、平民百姓誤撞竟撞出真相，只係《起》較專注問「正義」兩字 - 林父罵兒子不務正業，林反駁問這世上有冇人能為正義做些事，其實還問得諷刺：行正義唔係本來就係警察做的事嗎？結果唔係犯法者係警察，就係警察馬虎，嚷別人公司反正有得賠而懶得去查。父親因親情尋女無乜好拗，但高登仔查與其無關的解款車跌錢真係只為正義？可以有人真係好得閒、又可以係眼紅別人拾金而去打劫、林駁其父聽上來更似係唔想返工的藉口，「正義」在此淪到係「廢青」或逃避現實，或另有目的，單純的正義仍在嗎？
四年前中村義洋的《白雪公主殺人事件》也是一群網民「起底查案」，實則係集體欺凌，結果還是警察才查出真相。到今天《人肉搜尋》要靠父親誤打誤撞，《起底組》更係烏合之眾卻竟三個臭皮匠勝過一個諸葛亮大破一起大案。你問唔係早有《蝙蝠俠》嗎？但那是惡人太強，任何人都無力對抗才需要英雄。《起》卻嚷警察本來不擁英雄專利，平民百姓也可行正義做英雄。你話薛可正會否下爬輕輕，其實爆出警察都係人也是呼應潮流，更重要係最後還是鄧麗欣這個執法犯法的自己出去投降，而唔係毒撚林耀聲押她出去：即使執法者爛，但一介平民自以為是就能持到正義而且很容易？未免說得太早了。
沒有留言:
張貼留言