《逆向誘拐》 - 一封叫人撕到稀巴爛的情書

黃浩然的《逆向誘拐》 (Napping Kid) 係點睇都會睇到人拍檯拍凳發皮四。

認真當偵探故事睇，開頭雖已估到卻仍不相信會就是這個擺明地鬼祟的小儒（蘇麗珊），豈料電影係咁話其他人都係白痴：上一代的老差骨唐輔（邵仲衡）在資訊世代下完全無能，「綁匪」叫做乜跟住照做無反擊之力；毒撚阿植（吳肇軒）就算財才兼備，卻純情而陷情就自作肉參；最混帳係阿植家說是甚麼富甲一方家族，保鑣都係只識做狗仔隊，故此白白被個小妮子騙得贖金。一味恥笑有錢人男人同唔識電腦的人，唔認真唔拍案叫絕係會令人叫搵笨。

你會話黃唔真係拍偵探查案：鏡頭穿越中環半山街巷、飛到大澳維港上空、注視尖咀天星碼頭文化中心，係叫你看到香港的美。但香港唔只有中環，黃對上套《點對點》的試拍每個地鐵站仲似有心看透香港；中環其實是甚麼地方？叫商業中心，亦即是戲裡那群玩弄財技之徒的駐紮地，縱使沒暴發戶的庸俗，卻也低極都係中產氣息。至於大澳，其實係無人機上空飛過沒著地，平民百姓的避開沒拍。這戲更合切的比喻係叫一平庸面貌女人戴大眼仔擺好姿勢，只叫人以為她真眼大波挺腿長之寫真。

電影最納悶的係小儒早知阿植係有錢仔，卻唔直接請求甚至色誘他捐款，而係做一大龍鳳度出個左假右真綁架案來取一筆做所謂慈善大事業。你或會辯護若阿植一早直接給錢小儒，情景只會淪像狗公見母豬唔理三七廿一直接拍拍拍拍，人類既然會寫愛情故事，早就唔係禽獸了。所謂整色整水綁架案，叫比喻愛情係轉折而花巧，人禽之別在這裡。

諷刺的是飾毒撚阿植的吳肇軒，在《以青春的名義》還會扮阿飛裝風流，來到這套卻係對小妮子蘇麗珊手足無措，明明佳人依在身旁，卻一吻下去也不敢，難怪會被她玩弄在鼓掌中。蘇原本平平無奇，但因從傾心於她的富家子身上詐得一筆，最後洋洋得意。正如中環尖咀，從唔係香港只有的地方，但鏡頭只穿梭這裡，好像只有它們係香港見得光之地，扮Q哂野。一封旨在抬高自以為是港女的所謂情書，有種點的男觀眾都會想把它撕到稀巴爛。