《毛俠》 - 子非狗，安知狗？

有人話《非同凡響》沒片商重視很可憐，其實有套更陰功的叫《毛俠》 (Paws Men)：《非》的影評多不勝數，《毛》呢？好似上了一個星期也沒多少人看過似。

你會以為沒人寫這套只因沒啥好評，事實其由行銷技巧已可大講一餐：海報顯眼的是林盛斌林耀聲劉以達陳麗雲陳逸寧等五人大頭，諷刺的是他們根本不是主角，只係主角「毛俠」四人組 (陳達仁、安采妮、區焯文、李兆麟) 係比他們更沒人識 - 這是電影似沒人看的原因：賣戲唔知賣點的唔識去賣。因為製作單位的配搭很叫人摸不著頭腦：編劇呂筱華上一套作品係《天水圍的日與夜》，導演區焯文，其上一套作品，叫《鴨王》。

有人話電影像呈散文式，只係夾硬三個故事堆砌一齊，沒明顯主旨故沒啥好論 - 你睇過《天水圍》就應要預左：呂係白描法刻劃開中下階層，只呈現返你我身旁的事，沒甚麼神秘驚奇，也就難感有故事性。用區 來執導或一係好歹加返D戲劇成份費時悶死你我，另一係睇返《鴨王》：你以為做鴨很爽其實比雞更不好當，只因人的自以為是之心會玩謝自己，這套亦然。

其實「毛俠」四人組並不是只係純一條金線穿貫三粒金珠：先講林盛斌的「掛狗頭賣羊肉」的提返「何來係狗」，或更應注意係庖廚那件肉 – 羊狗也是畜牲也是命，為什麼只要唔係狗你們就心安理得？林既然唔想其實不如堅決不做，甚至可去舉報食狗之人。但他卻欺詐他人的狗來放生，而且放開牠們在燒烤場，唔會再被漁農處甚至其他吃狗之人去捕捉？林係怯懦只為求自己心安理得係可笑；陳麗華的「虐狗婆婆」，只係唔懂而非唔愛她的狗隻，但最後哭哭啼啼又說要交給漁護又唔捨得，如此處理又似係嘲笑老人家目不識丁。

電影最會恥笑，係那班「毛俠」 - 五湖四海但都唔係富家子弟，各為生活奔波卻要夾硬抽身忙於救狗，卻沒問他們做大俠係為什麼有何得著？電影似話唔使畫公仔畫出腸，就係愛和責任滿意未？其實自叫做俠，就係英雄心作祟自以為是：結尾一隻隻外表淒慘的流浪狗，像呼喚這世間需有英雄出來救助。但狗的悲慘，大多都係人為，用牠們的可悲來滿足人類的英雄心，係令人作嘔的本末倒置。

子非狗，安知狗？「毛俠」叫救助，卻又自把自為為流浪狗挑選主人，唔信狗會自選其路（虐狗婆婆）。中段一幕林耀聲與「毛俠」們爭在巷裡尋狗，人在巷裡迷途，狗卻悠然自得。也在諷刺人類自製塵垢 – 人若與狗能共存互不相干，那需英雄？又何以「何來係狗」？難怪此片提不起勁，怪就怪在區焯文騙起人的熱血，卻在背後一桶冰水冷卻人。