《別叫我「賭神」》- 坐這山望那山就係叫甚麼都不是

 

周潤發難得「新作」，見有廖啓智就知實係塵封好幾年。但見發哥都要親身賣力地銷，就知縱使有他坐鎮，這套都係毫不吸引。

究竟差在邊度？大家都批故事老土，但小弟都常講橋唔怕舊：兼且發哥迷人在那？ 就係那調皮客家佬，點解叫《別叫我「賭神」》(One More Chance) ，咪就係叫你以為發哥仲做緊賭神高進，問題係未睇過《賭神》的一代實寸話：梗唔叫你賭神啦，你條爛賭鬼點神呀睇過？

 

但唔係叫返《驕陽歲月》就可解決，而且這套又要搭上自閉症：講自閉或傷殘如《黃金花》還是《媽媽的神奇小子》，唔係只講那症狀或經歷，重點係帶出怎樣的人生省悟；這套卻係自閉、爛賭、跑步等集合哂，反而就沒樣反省得出：你夾硬話有，但講來講去咪又係沉迷賭博倒錢落海輸左頭家值得嗎，這些睇電視戒賭廣告都睇到嘔，咁做咩要駛錢入場睇多轉？

 

就算你唔嫌老土講賭，重要有發哥睇中自閉的柯煒林識記牌，但又唔會在賭枱上賭到盡，只因賭賭下又諗起袁詠儀，接著又方中信黃德斌盧慧敏安志杰等逐個逐個插入來，最後就去左跑步，重要跑跑下澳門街就跳左去西貢東壩獅子山沙漠 - 就係這樣坐這山望那山之態，於是就甚麼道理都度不出來。

 

所以無論《別叫我「賭神」》還是《驕陽歲月》都不合題，旨因電影既不專注賭、又不專於跑步，直講就係四不像。難為發哥還是說很喜歡這劇本，卻似係說很勉強：縱使對白明顯俾佢自己發揮，卻又唔讓他去傾盡賭枱上，潘耀明係白白浪費了發哥。