《新．幪面超人》- 無意義的打還不如叫濱邊美波笑一笑

 

通街都話《新．幪面超人》(SHIN MASKED RIDER) 係本年度之大伏，我坦認入場只為看濱邊美波，兩小時片長你給我看夠她九十五分鐘，我都會心滿意足唔會和你計較那麼多。 

若你要我正經點評：見大家都指這套成也庵野敗也庵野秀明，但既然咁講，就唔係庵野失手。或就轉問庵野的英雄片有甚麼問題，定還是否係一個問題？ 

 

或大家都彈故事鋪排，所有角色無論正邪，都似彈出來話打就打。但點解要打？為何做超人定奸角？都係一輪嘴口水解完就叫咪再問咁多，更甚者時會臨開拖時中途退卻突兀非常，總括就係冇戰意。

 

庵野是甚麼起家 -《新世紀福音戰士》 (EVA)，《新幪面》就係擺脫不了它依然承繼：池松壯亮的本鄉猛只係有氣概點但都係不欲出手的碇真嗣，短髮濱邊美波 (飾綠川瑠璃子) 擺明係參照綾波麗，常企在後方望著電視食花生的差佬竹野內豐齋藤工等似碇源堂，綠川一郎 (森山未來) 所想的只有「氣」而沒有肉體的「人居計畫」，這豈不是一種人類補完計劃？

 

更重要係若《EVA》在追問意義，《新幪面》似問得簡單卻又解答不了甚麼：長澤正美去當毒蠍強化人，出場只得兩三分鐘更沒和本鄉交手 - 成套就係瀰漫一種「何必呢？」的氣氛，正如瑠璃子見好友黃蜂強化人 (西野七瀨) 被殺後慨嘆；一郎自說要創一個沒有暴力的世界，故此他自詭辯唔係殺人，而只係竊取活人的「氣」。正如SHOCKER的人死後時沒有屍首，而係化氣煙消雲散，像述反正一切到最後都係虛無，故在世間甚麼正邪恩怨情仇何需執著，故每鋪打完都唔覺暢快大快人心，只因根本「未解決」；一文字隼人 (柄本佑) 說係承繼本鄉猛等遺志，但本鄉的我為人人，或就只係「懶好人」，這樣打下去還真的為人好嗎？就係誰都唔知道。

 

就係唔知打來為乜，《新．幪面超人》再要添食似乎很難，你問我還會否捧場？我答曰濱邊美波應不會再有下場那我怎捧場。其實若無休止無意義打下去，還不如叫美波唔好太西面，她笑返一笑世間都應平靜了。