《東京貴族女子》- 或者我只是幅蒙羅麗莎

 

早就講過：未入場就得知一套戲「悶定唔悶」，最快捷方法莫過於看其電影評級 - 一級就注定即使簡介道出兩女一男格局，你都唔使旨意見到兩女如何爭仔爭到出哂面。

 

岨手由貴子的《東京貴族女子》(Aristocrats) 還真「悶得可以」：本來要唔沉悶就要搞矛盾對立，可以只係貴族對鄉下老百姓，或是放大農村與東京。但無論人物還是場景之間，外觀上都沒太大對比：榛原華子 (門脇麥) 和時岡美紀 (水原希子) 首次相遇，竟係互相獵奇，仲要貴族女子驚奇窮家聖誕沒佈置聖誕樹，台下觀眾卻都納悶有乜奇好獵。要對，鄰國奉俊昊《上流寄生族》就對得明顯，要再強烈點還可以到再隔成個海的鄰國，只係那國家只有暴發戶，唔會有貴族。

 

你話門脇麥不會大笑大悲呆如木雞，其實水原希子唔好得太多。若貴族華子像個只會插花裝飾沒有其他的花樽，美紀卻像煎完牛排還可以扑濕人平底鑊。一度猜疑明明主題講貴族，那讓一個平民佔太半篇幅會否妹仔大過主人婆？想到美紀或唔係用來對立，都可以係牽繫：正如家貧要出來陪酒又要退學，貴族也會難找到想要的「普通人」，以為找到卻又係唔普通地時機不對對家更不對 - 正因沒太大差異，故彼此也會身不由己。

 

若講最多餘可能就係高良健吾，夠高章就係這青木幸一郎不正面示人，你會猶豫這會否悶上加悶，或者雖叫《東京貴族女子》，我卻沒打算讓你獵奇我這貴族，即使你嫌我只是個不如平底鑊有用的花樽，但我就只是如此，讓你們駐目就夠。正如蒙羅麗莎，有人會看兩眼後嫌悶就走，亦有人會深思到底她的微笑係善意定恥笑，但嚷大把錢要買來拆開看究竟的，都係目不識丁的暴發，肯定唔係貴族。