愈來愈覺得做陳果粉絲係件為難事，就係要我評《 鬼同你住》 (Coffin Homes)，左度右度都係劣評行先：話恐怖已唔係，但搞笑抵死就更加唔係，以前 《香港有個荷里活》 到 《三夫》 唔叫賣抵死卻有其效，今次講係賣點卻又賣唔到貨。
歸根究底係陳果太貪心，若主幹真在黃又南，邵音音李麗珍一家可略去，若然你叫音音姐落力，咁就唔好D血腥場面借哂位，差D叫人諗這算點的三級。又有幕你一刀來我又一刀，唔暢快卻又唔滑稽，卻又流露接下來很多都似亂咁來拖拖拉拉。
諷炒樓本來已玩到老撚土，由彭浩翔 《維多利亞壹號》 到 梁國斌 《死開啲啦》 - 十年間樓市暴升，就有人把樓和黑色幽默扯足咁耐。更叫詫異係陳果既有大把「參考」，卻又自己唔識講故事。定還是見有人玩過，於是就另種玩法費時被指執下口水尾：故事散亂無章，講到鬼鐘意彈就彈出來，人也就話死就死，臨到最後新鬼舊鬼一單位六國大封相，新鬼竟驚死兩次，一個個無頭鬼噴彩色顏液，場面像全員上足電的rave
party。
彈完到幫偶像辯解：話佢亂咁來前要留意此片拍在甚麼年份，時見有人戴罩更直接彈了句疫情，講明此片係拍在二零二零 - 這年唔止係世紀大瘟爆，也是宇宙無敵国安大法降在香港，所以劇情愈推進愈叫亂交叉來唔係無理由：就係「香港法律最偉大地方」由公平公正變做改來改去已直必腸爆左俾你
- 睇完戲再看當世情，就覺陳果真會預知。雖然你又窒只要智商唔低過八十，上年那時都係會預料到今日此時。
但陳果卻唔係哀This
city is dying：主題叫諷炒樓，更深層係唯利是圖，也是小弟以《逆流大叔》做例講既搵笨 - 九十尺劏房再改做八十、十碗魚蛋粉拆做十二碗、招上百窮人晚入早出豪宅助避空置稅，周街都瞞上欺下，即使亂過亂葬崗人們都照玩。此城的核心價值根本唔係自由也不是公正，所以国安大法唔係呃殺，反係保證此城可繼續你搵我我搵你笨，反正窮撚搵到資本家笨，也算是一種階級鬥爭啊。陳果道出此城的生存之道，只係既然如此你還覺得此城應該生存下去？你還真係好撚鐘意呢個地方？
沒有留言:
張貼留言