《聖荷西謀殺案》 - 誰令到佟大為變成笑話？

 

香港觀眾似對佟大為這大陸仔很陌生，但你睇得戲多還應對他印象很深：在神片「天機」裡他正飾演日本仔奸角，沒他作劉華對手，似再沒有誰有能力吹漲觀眾到極至。

 

點解要講起他？就係《聖荷西謀殺案》(Fatal Visit) 到高潮，即與鄭秀文蔡卓妍三人相撞時，理應緊張卻叫觀眾恥笑起來，佟被槍殺時觀眾反應更如睇《The room》Johnny自盡一幕。你問點樣比悲劇更悲劇？大概就係你設成悲劇卻被當為喜劇，而佟卻就係有這種能力。

 

你或指小弟說得不對：搞成這樣根本唔係演員而係導演問題，孫健君已叫凡人唔好意思再論，那就講潘源良 - 對上一套《影子愛人》就係理應驚險的毫不驚險，來到今次話要迫佟去開殺戒，點迫呢？就係安排同鄭的矛盾，迫瘋他嚷說要擺脫鄭的擺佈。但觀眾一見佢識駕車就問咁你又唔真係開架車走人？既然離家一排卻又未能冷靜，一返到來是但拍下蔡膊頭就嘈話要殺人，佟行徑像幾歲買唔到玩具就賴地喊的小朋友，一個幾十歲的成年人如此表現真係叫誰都笑出聲，但睇來都係故事編排搞到他如此。

 

叫潘源良來解似會死撐唔係故事薄弱，反窒你們根本唔理解甚麼是中國人：正如《金都》裡楊樹偉因有廉恥故還是不去美國，因為來到美國拿了綠卡但骨子依舊中國就係沒有意義。佟大為識開車又如何？佢始終做不到《德州巴黎》（Paris, Texas）裡那種美國人 - 自由就係要敢於隻身奔向並自我負責，自問做唔到好丈夫好父親就自我放逐而不怪責何人。佟就係擺脫不了中國人基因，潛意識覺得自己根本要被管，於是自牢在聖荷西，更反怪責鄭困著他 - 如此賴皮個性，才是搞到高潮爆發變爆笑之主因。

 

話時話《聖荷西謀殺案》係講乜？係講三個香港/中國人到美國想發美國夢點知搞到發惡夢。明明悲劇，卻搞到變喜劇、佟大為演悲劇人物卻搞到變小丑，問點解搞到咁那就要問下係咪在正常環境做唔正常事，若唔係潘源良問題，那就係中國人本身問題，當然你都可以試問一下潘認唔認自己係中國人。