《情書》到《最後的情書》- 帝國大廈豐川悅司

或者尤其岩井俊二迷都深信：《最後的情書》 (Last Letter) 係因應《你好，之華》而來只係客套話，事實係《最後》才是一早定好作《情書》之後，只係岩井要去大陸搵銀，就要懂得客人有著一棵玻璃心，況且他或就知客人的妒忌心未必係不可理預。 

你唔係岩井迷的話實問：若早知《最後》只係搬《之華》過紙，仲係兩隻大狗連換做隻貓都唔換般懶到痴線，重要岩井拍大陸東北農村卻拍出種純樸美感，相比高清下的宮城卻顯得平平無奇，咁再花錢入場睇《最後》又有何意義？或許看頭在選角上：唔係話松隆子福山雅治這些，中山美穗這個畫出腸講這套才是承繼《情書》的也真只是客串，真有意思的係做渣男的豐川悅司。 

豐川回到《情書》裡的角色叫秋葉茂，係渡邊博子的第二任男友，就係藤井樹去世佢才做到，但他就是介懷始終無法在博子心中真正取代到藤井；來到《最後》，那句依舊的「因為她飛左你你才會寫小說。」的洋洋得意，換到豐川來說，卻像茂向藤井哂命：我終於可以在博子心中取代你。 

你問其實有甚麼好妒忌？唔係話文青沒用不如一個壞男人嗎？且事實係藤井樹就算係校園的風頭人物，但離開學校咪又係普通男人。重點係兩套的豐川都自覺係《帝國大廈》- Swing因應九一一後而作的歌：你只係有著運氣而唔係本事去得到那個位置，這種心生不憤係永無法釋懷 – 即使你駛橫手得到她又如何，你始終不是她的第一個。 

有趣的是：《之華》似在嘲諷文青無能，來到《最後》卻借豐川為文青平反 – 文青沒用論似是一無是處的渣男生安白造踏低文青：因為壞男人就沒有甚麼叫你記低，只能等候被磨滅。但文青卻能留下字句甚至書，讓你永記在心或傳承。就係你最後只能隱沒在遠處的角落，我卻能化身另一樣伴在她身旁，你憑甚麼話我比你更沒用？ 

所以點解《你好，之華》要排在《最後的情書》之前，係知道人就嫉妒自己唔係第一個，更何況係某國人。就係出返豐川悅司，始終嘲諷其實我不在意那個才是第一，因為第一唔係The best，你始終就不如一本書，或一張畫，讓我永記在心。