《叔・叔》 - 懶好人

楊曜愷回到香港的《叔・叔》 (Suk Suk) ，主角年紀係《紐約斷背衫》的乘三，只有九十七分鐘片長，但都係感要乘三的。

唔耐煩感唔似係節奏問題，十分鐘交代一下柏 (太保) 家庭身份，跟住就在「魚塘」旁的公園遇見海 (袁富華)，傾兩句柏就問：「入唔入去？」新版莉香都係第二集先叫完治上床，打鐵趁熱仲快過時下後生怎叫人好意思嫌你慢？再者一睇海報都知是甚麼人的纏綿，係你自己唔先睇清楚又那有道理話睇唔慣？

 

就係看到結尾出字幕，才知唔耐煩感係來自柏的為人。

 

只看柏而不看海，他是個讀書唔多但舉止溫文、會照顧兒孫、唔嫌棄窮女婿、生活「沒所謂」的人，簡單講就是個好人。原以為電影走向如《翠絲》，到中後段就會「認清自我」，跟住就係場大吵大鬧，來叫自己「重生」。結果卻由始至終平靜，唔好話衝突，大聲兩句都沒。又見柏由得女兒嫁窮郎，並送上的士叫自己退休，似逐步放低以便「做自己」，但佢最後連海都放走埋，躲入教堂祈求上帝額外恩典與海別處再會。

 

好人就係唔想麻煩到他人，拋妻棄兒女的他就係唔忍心做出，也就只好為難自己。其實做好人無著數，為何要做？你話我講得唔啱聽我都係咁覺得：柏只係個「懶好人」 - 根本唔係真想做好人，只係怕事怕麻煩 - 所謂社會日漸包容，老人出櫃仍要忍受鄰居目光，又要照顧兒子感受，即使兒子真是你親生，他同你一樣都係收埋自己落櫃的人，卻又無法彼此覺醒。

 

你話《紐約斷背衫》的年輕人在更包容的美國都要懶好人，何況日漸抑壓的香港？更不想變的老人？楊曜愷或唔識描大陸人美國人，卻真係識繪香港人 - 保守兼道德潔癖，想著做好人安穩就夠，寫「懶」好人並唔係唔識寫，懶正指懶得改變費時抗爭，最後只好求上帝憐憫，但上帝似會看不起唔努力改變命運的人：「你還有一息尚存卻不敢聲張，像某個小兒子拿著一塊錢卻沒去賺多一塊錢來，我只會踢你到深淵咬牙切齒。」走出戲院，看看目前的香港，你才會相信懶好人不會叫人上天堂而係推向地獄。