《我們永不言棄》 – 沒有放棄只有放屁

你真別說周顯揚唔夠運。 

處女作一出就被片商大推，儘管得出媽聲四起，之後還可以陸續有來兼卡士都不弱。來到今天，就算港觀眾都厭合拍片，但十年前罵聲遍野的《殺人犯》到今日卻被視為經典，加上逢疫情緩和戲院剛重開，戲迷視入返戲院睇戲如久逢甘露係戲都殺，《我們永不言棄》 (Knockout) 在這時勢反似會有斬鑊，所以話周總會食屎食著豆。 

但電影如文學，有時還真要文窮才能後工。周一直都有運，所以之後每套都平庸。《我們》係編劇都唔需要杜緻朗，由他我手寫我心：寫拳擊搭親情，卻係寫到唔知想點。就係《殺人犯》的優點繼續不了，要命的就繼續攞你命。 

你會發現講拳擊講得很表面：就係開場表演一下，跟住就直情擺埋一邊，就話返返拳館工卻又唔會耍返兩招，到後部先又再表演拳拳到肉。簡單講就係欠缺鬥心 - 《犯人犯》好歹就係一個個堆砌，到中段一野引爆。這種技巧周卻沒領受：內容有背負、親情、還是生活不如意，這些卻又和拳擊不相關，唔似《激戰》般會推人上擂台，反係勉強堆埋九唔搭八。 

講到親情尤其那個女兒，其實一個細路女那用多說話，周卻係要驚人唔出聲當佢啞，於是無謂造作的說話多。所謂《殺人犯》成敗也在譚真一，就係你偏要個五歲細路講埋D「你老婆一定好靚」。十年過去，周又唔會吸取教訓。最慘係我還期待會否有人自爆有不老症，可惜就係唔會發生。 

若要簡單道出電影問題，就如戲裡外婆只會用一大堆玩具取悅小女孩：一味只識燒錢，場景人物華美亮麗，內容卻係飄忽唔知講乜，這也是自「天機」以來大陸電影的富貴病。電影名《我們永不言棄》叫人不明所以就係看不出你有甚麼迫著要放棄，口氣卻如香港某件老而不，食滯總要排氣出體外似。 

講真，夠運又如何？