《墮落花》 - High大而不能宏大

李卓斌似有點推銷員天份，唔駛搞定全世界，只要搞定眼前金主就可：《墮落花》 (The Fallen) 能於《G殺》拍完後而來，大概係吹得有夠吸引的大綱，話之拿到錢開機後係另一回事。

李兩套作品都係人物眾多，今次講製毒家族加一高層兼一警察，叫你以為係宏大的故事。但看到片長你總會懷疑，只得九十七分鐘要講足咁多人很是勉強。事實上成套戲溫碧霞玩哂，關智斌陳漢娜艾迪陳煒等都係隔段出來點綴，尤其近年沒怎出沒的關就知如此，故似刻意狂燥來博你看多一眼。不過唔好意思，我眼球只會注意你在推郭奕芯還是莊端兒，而且推極都沒露出多忽肉，這是那門子的三級？

 

或同樣要給點表現機會陳漢娜，於是叫佢兼做旁白婆，但你聽聽下會覺其未免講得太多，搞到像聽廣播劇。其實去到中段你大可小睡一下或去個廁所，反正尾十分鐘那個快撈波士「先生」 (黃錦燊) 會彈出來再自爆成個故事框架。到最後原本啥都沒有的溫碧霞，又突然有成隊兵叫成家陷家剷，李似想學《標殺令》，卻無厘頭學左羅守耀，搞左個《滅門》式的結局。

 

若你堅持坐定定睇哂，係好歹講毒品都會粗粗地講下搵三隻化學物溝埋製冰，跟住就係溫碧霞成日追龍，一味迷糊，於是同關智斌艾迪等較量、或陳煒點給人隊冧都似含糊帶過，沒多少情節鋪排，故故事金玉其外，內裡完全輕薄沒重量可言。

 

要總結成套《墮落花》，還可以借《BOY聖子到》都係講毒品的第二卷：小混混老大神崎濫藥叫自己以為天下無敵，日日野卻篤爆他只在逃避恐怖痛苦才是真正喪家之犬，結果一句：「你所謂的猛料都係幻覺喳！」後其就遭一拳KO。