《華氏11/9》 - 鈍而笨重的關刀

唔知我老了，還是米高摩亞老了。

十年前米高摩亞，還是叫我專注甚會有所激動。十年後的如《華氏11/9》 (Fahrenheit 11/9) ，像未到中段已叫我想呼呼大睡，為免白白浪費八十元票錢，還是伸伸手腳想叫自己精神一下，應該踢著了前排的椅背。戲完出字幕，坐我前排這個觀眾突然拿咪走到台前，我想他唔會就出來大罵我踢他凳掃他雅興吧。看真點，係十九才子陶傑，他開咪後我才知我想多了。

看得厭倦係早知米高摩亞的套路：一個左仔導演，即使他扮旁人皆醉我獨醒，選舉時提過大家別要看輕特朗普，他始終都係這個思維 - 特朗普根本不應上台，後部把他和希特拉並置更係堅定這句。但既然不應上為何還上得台？卻係東拉西扯到食水到槍械到民主黨素人，講到大家都有問題而造就特郎普這人，吹水唔抺嘴咁款，想人認真看你都難。

小弟早講過：如此刻意鋪排再大加自己註解根本係偽紀錄片，但陶傑話如此帶偏見的紀錄片才好看 - 係讚揚米高好歹夠哂誠實，佢一早講明自己左仔就係如此目光，總好過扮中立不敢講明自己己見。但扮客觀那就迫你要全盤看清楚才能佐證自己心中論點，帶偏見那就係我早就知你咁咁咁所以其他甚麼我唔需要理，就如瘋子大叫會引到隔離目光，到其長篇大論大部份人都擰轉頭。

電影話還有一億人沒投票，以此導致特上場係誤導：希拉里的全國普選票比特還多，特係靠選舉人票而上場 - 選舉人票就係教訓要選總統的不要只顧人多的東西岸大都會，還要顧及內陸人少州份，平衡各方才是民主真義。米高不信靠制度，但從沒詳盡質疑過制度問題，轉移就話政客只會造秀，人民無力改變現況都對政治厭倦，所謂期望就係全民醒覺而精英化。講得好聽，但些少諗到都知真如此又如何：即使全民精英，總會一左一右意見相左：就以槍擊案頻繁 - 米高講係因少數精英不作為，導致槍械管制這「共識」之事到今日還未達到：這「共識」只係米高自以為，事實係國人一半擁槍一半禁槍，即使米高理想達到，人民始終各持己見，又怎去解決困局？

講槍正叫人想起《槍狂帝國》 (Miss Sloane) ，這片精彩在於謝茜嘉謝西婷深入政制裡逐個擊破，再四兩撥千斤反敗為勝。相比之下，米高卻只對特郎普扣帽子、最後擺一個槍擊案事發學校女學生出來喊濕兩包紙巾 - 一味只在外圍叫囂。或者人大了自然會看透 - 米高電影就如一把關刀，外表大而威武，但刀鋒一鈍，那就還不如一把短小卻能直插心臟的匕首。