《追龍 II：賊王》 - 太重鞋油滑溜溜

《追龍 II：賊王》 (Chasing the Dragon II: Wild Wild Bunch) 肯定係王晶近年最博屌聲的一套，關智耀好可憐，明明係王自以為是都要陪他一齊捱抦。當然對王這種人動氣係無謂，大笑幾聲才是恰當的回應。

會叫觀眾憤怒係拿了Beyond的《我是憤怒》作開場：你以為係講一九九六時的躁動不安，怎料看下去卻係膠事連連 - 龍志強 (梁家輝) 開頭還有版有眼，後部卻俾哂機會何天 (古天樂) 通水，最後還親自入甕，係弱智遭成擒。龍這個人也算夠投射王晶 - 自以為小聰明卻係傻的嗎也不自覺。但王自己膠卻要膠埋Beyond的歌，就別怪會扯起一眾人的怒火。

最膠的都未係龍的所作所為，而係王落重鞋油引發：通街都話再用「追龍」兩字落戲名係夾硬來，王或話你我夠高章你識條鐵 - 畢竟香港係英國佬靠毒品 (鴉片) 奪取過來，英國殖民下的香港始終都係烏煙瘴氣，《追龍》已夠暗喻香港人要當家作主才能結束黑暗，到這套更係明言「回歸」中共國才能解決一切。王夠膽咁講，要建基 (佢以為) 香港人丁點歷史都唔讀：七十年代當你呃到人，九十年代成龍的《警察故事》大賣之時，話港英警察都係不作為的廢柴？你講野？

成套最好笑就係話港英澳葡警察通通無撚用，何天等唯有北上搵中共公安幫手，最後還要話龍仲係澳門係搞佢唔掂，要引佢衝關返大陸等公安捉佢，九唔搭八之極致。王忘記要表現中共的「英明神勇」，《樹大招風》早就做哂：葉國歡在中共國內無以當年勇，卓子強在中共武警槍下投降，一切簡單利落。王也想表現中共係如來佛，卻畫蛇添足叫佢駛多招「我佛你」 - 開頭眾公安循規蹈矩地佈局跟蹤，觀眾都笑有夠唔耐煩 - 現實公安見你成疊水擺隔離，早就有理無理衝過來搶錢再送你上刑場，就係真正如來佛只一掌就把你壓在五指山，點會廢話連連？

你或會話王晶其實係高級黑：畢竟和大陸公安有關的都切割容易，若把這些排除出去，成套會回復一定可觀性，王似老來省悟告誡大家 - 顧全大陸只會累柒自己。我唔信王晶會如此好心，始終《追龍 II：賊王》就係套以為你白痴就肆意落重鞋油擦鞋，怎料鞋油過多滑到你仆街，以笑片論，王晶好歹夠遠超今日的周星馳。