《新喜劇之王》 - 如夢

你問《新喜劇之王》 (The New King of Comedy) 導演究竟真係周星馳還是邱禮濤？講真係問來無謂，因為此戲係人都可以去構去導，更甚者若你係星爺粉絲，你當係邱導才會令你好過一點。

「舊」《喜劇之王》其實係講一個努力不懈但固執硬頸自以為是，唔順應制度一直未能上位，但始終都成功的故事。《新》都係這個套路，還是死抱本《演員的自我修養》，只係主角更柔弱，欺凌她的人更多，叫人同情她而待夠九十分鐘，到成功的一刻即可收工。話係阿水都可以導，因為就似係讓個電影系學生剛好合格畢業的功課。

點解話唔當係星爺執導才不會傷到你心？星爺的賣點是甚麼？係無厘頭：「舊版」係最終另找途徑，因為天生我才必有用才跑出。《新》卻更順應原來制度，即使慘遭玩弄，卻唔反抗唔另找途徑 - 碰到二世祖知己卻要清高不收其廿萬，見到過氣演員馬可 (王寶強) 誤打誤撞靠網絡咸魚翻生都唔想去照辦煮碗，堅持乞求制度賞識，也於是意料之內成功，沒任何意想不到，暴露星爺再沒無厘頭的能力，雖然知他早就沒有了。

若你係星爺死忠迫我點都要搵出個優點，就係他好歹都會自嘲，馬可似是他夫子自道 - 一個自以為有名氣不可一世，實則無料到，要給人大摑一巴才醒。當然也可能都嘲諷大家：係呀本來我就沒無厘頭的料子，只係你班盲粉像我隔離的四眼師奶啦啦隊，正因不止一個於是我就能拿個名字胡混到今天。

或者咁講，《新喜劇之王》笑位不在戲裡任何一點，而係成套戲：搞成笑料的一個方法係就在唔正常的環境裡做正常的事 - 在一個靠關係或金錢或潛規則的環境裡，你還堅持忠直做人遵從制度，最後竟真讓你成功，仲要給你勸人努力不懈總會出頭。星爺或沒種刺破現實，但主角叫如夢 (鄂靖文)，始終暗串你竟然相信，還真係最大的笑話。