《如珠如寶》 - 林敏驄的恐懼

今年所有賀歲片，《如珠如寶》 (A Lifetime Treasure) 係最不叫人為意的，或者理由係，你見到導演係邊個，都預左套戲係大條道理傻的嗎，你出院再大罵只會給人笑你自攞來賤。

你或話我咁講就唔岩：林敏驄的傻，擺明係扮出來，最會扮豬食老虎其實係佢 - 大家都嘆彭浩翔江郎才盡時，林只要四平八穩，對比一下就覺得其實佢都唔太差。問題係林既然賣點係扮傻無厘頭，見到劇本一本正經穩打穩扎，你反而又會失望了。

老實說就算林自持小聰明遊戲人間混飯食，洪金寶泰迪羅賓梁小龍吳耀漢等老行尊唔似甘願和他胡鬧，那似係他有話要認真說：見到泰迪同梁，就醒起《打擂台》，只係《打》算係實在，來到這套，加埋恬妞幾個甚麼風光事跡聽落似一味吹水，後部係會耍兩野，但又似係年輕見面前老人家就讓哂半球，如此「賣老」很是硬銷。

話電影太穩陣係為了推進劇情，也要老土製作些正邪對立 - 後部林敏驄向惡人林雪跪地請求：「可唔可以俾條生路老人家行？」林其實今年已到六十之齡，已到老野卻眼見社會愈對老人唔寬容，上至想拿份長者綜援又要等多五年，下到社會仇老之風到常被指為廢老。林自知將淪為會被欺負的一群，就先一跪以求往後好過，也解釋到為何洪泰迪梁吳等會陪他「傻」埋一份。

這是電影最不叫人欣賞的地方：賣可憐博同情只係自認自己係廢，若然係有料的為何不挺身捍衛，最後一眾老人憑自身之技打退惡人，更係突顯林係跪來多餘 - 真夠強悍，何懼對你不寬？林敏驄的恐懼，簡直杞人憂天是也。