《恭喜八婆》 - 無復當年勇因知你班到底係八婆

今年一堆賀歲片，暫最應酬交差o個個係彭浩翔，對返《低俗喜劇》，《恭喜八婆》 (Missbehavior) 俾盡只有返六成功力。

成套故事其實就係惡搞杜琪峯經典作《PTU》，仲要梁詠琪軍裝上身，再講埋「大家都係自己人」，開頭已經擺出個「係呀翻炒呀吹咩咁你睇唔睇埋落去呀」的口吻。用人奶代槍，尋奶途中的笑料：大波助理戇鳩用影印機、茶餐廳用英文落單等，明顯只將近年的網上笑料搬字過紙炒埋一碟。

你要我公道點，就當養羊計劃或同志呃人奶都係佢自己度出來，但對返《低俗》的「喇西奶西」，簡直差了一大點。《低俗》同樣係本小，但係可以刀仔鋸大樹的典範，那是因為彭還有大隻腳站在香港，沒有懶做功課的理由。北上搵唔著多少叫倦鳥知返的彭，根本無心站穩：ABC餐這街知巷聞的笑話，反係敗露了他沒再深入挖開本土。

相對其他，彭本來價值在於如謝賢講的夠賤夠仆街：還算敢用女人身體開玩笑。但以前的彭係敢玩政治 - 《志明與春嬌》串爆笨柒的控煙政策，《低俗》更係夠膽指大陸人係蠻夷。今日這套，卻係識趣地政治兩字提都沒提，氣慨盡失。你這彭氏死忠還可能會幫他死撐：八婆嘛，佢地除左飲飲食食返工大過天男歡女愛之外，你想佢地傾更高層次既野？彭只敢講女對波不敢講政，其實係睇透 - 為支人奶赴湯蹈火本來係笑話，但是香港人能頂盡的義氣，若我真禍從口出到唔止係無工返，而係被綁上洗頭艇又再北上，你班八婆會為我挺身而出？別太天真了吧。

都係個句：彭浩翔只可來回憶，已無法再回當年勇。《恭喜八婆》雖真大部分角色係女人，但亦似一大班被閹割後的人，受傷後就投鼠忌器只敢開無聊玩笑。若你這樣也收貨，那我都明白彭會這樣交行貨算數。