《女士復仇》 - 揸槍揸刀就變女強人？笑了

你以為火火有心幫鄧麗欣周秀娜樂基兒三個已年到三十的轉形像，少年你太年輕了，轉形唔係叫佢地著Bra top，左手揸槍右手揸刀就轉到的。

且看《女士復仇》 (Husband Killers) 幫三個女角起的名字Chanel Dior Hermes，就知火火一開始已存心玩野 - 自以為很高檔咪又係扮哂蟹：三女說係殺手大賊SDU好身手，但聚在一間酒店要互殺對方，竟由日拖到夜一夜先開拖。在酒店大堂三方槍戰，酒店主人孫佳君淡定坐在一邊睇戲，像預知無論槍火如何激烈，都係流既。

場景用上龍華，夾硬要佢做返酒店，大概看上其門口一排紅燈籠 - 張藝謀的《大紅燈籠高高掛》：同樣三女的情人男友老公David最終都沒現過正面，講到David係靚仔定有錢還是有甚麼技倆御女都唔重要，諷刺係三女就為這個男人鬥過你死我活，如《大紅燈籠》般的妻妄婢女間爭鬥。《大紅燈籠》的時空是在父權社會，這套則放在所謂女權高漲的新時代，但就算女人能武能槍，卻仍只為一個男人而爭鬥，反映其實到今日都沒實際進步過。

你會話結尾唔係三女想通沒再理會那個男人分道揚鑣？這是你太快離座，「真正結局」係三女夾手找到David復仇，的確有仇不報非君子，但始終咪又係要執著返一個男人。所以你話叫女人揸槍揸刀就叫她們變強桿？別逗我笑吧。