陳茂賢的《不日成婚》 (READY O/R KNOT) 一擊即中叫人過癮，你若是吹毛求疵，當然又會諷只係橋唔怕舊。
要似就係唔只似彭浩翔，催眠也可以話係「參考」《精裝追女仔》，炒得最明顯可謂：「男人唔知自己要乜，係女人話佢知要乜。」咪即係小弟成日提的楊德昌《麻將》金句。
故事認真夠無聊，係想結婚的女人（衛詩雅）同驚結婚的男人（陳家樂）之間較勁。卻又成功，旨因為即使場景係住大屋，重要得閒就搭直升機過澳門叫兩個鐘雞這麼豪爽，卻又如《三五成群》叫貼地現實：就算左炒右拼舊橋，但對白都係落足功夫，就是不論貧富女人都係會八婆並計算伴侶，男人都係麻甩咸濕，只要夠賤 – 講好聽係對應到人心底所想已夠應酬銀幕前大多數。要計較咪始終未夠：話驚俾唔到人幸福所以驚結婚，喂你仲係野比大雄係度「叮噹2」（我唔知咩叫多拉A夢）咩，坦承話係你想玩多幾年，玩到累至想定落來咪算囉。
你問小弟點為之一套成功電影？其實就正如戲未所講令自己現在知道需要甚麼：這個文字獄時代，你叫陳茂賢似足彭浩翔根本強人所難，就係彭自己都無種諷刺當世。你無種就無謂鼓動他人當勇士，那就食飽成婚安穩，老實做人算鳩數。雖然你也會偶然心邪想出軌放鬆，反正這妖魔橫行之世，你也不算太賤格。
但陳又如《金都》般勢估唔到，現在就算你有錢，都唔會俾到你即日澳門梳乎完來回。咁睇《不日成婚》係另種維穩片，就係提醒你要令人得到滿足才能維穩。只係這個世道，我們明日能否去澳門，或再入戲院，甚麼再見到下一個彭浩翔已經係一個大問號。當然搞到如此，香港男人會爆得一發不可收拾，還是壓抑到如陽萎不振，又另一個問號。
你若問我想睇甚麼電影，其實就係想睇到港男敢作敢為，如《精裝追女仔》時的雄風，而唔駛如九叔俱樂部的收收埋埋，但自上年七月以後這會否太著望？
沒有留言:
張貼留言