《二次人生》- 無力的跑，實想跑離

 

何力恒《二次人生》(I Still Remember)，其優缺點已打在電影評級上  - 一級，唔會做作煽情叫感覺平實，但又係沒用力，叫俾左票錢入場的覺得蝕章：「係咪應擺電視度播算呢？」 。

 

《二》的主題係跑，卻又似想搞到如《激戰》《點五步》般：贏返一場就當把一切問題拋諸腦後。問題係跑是甚麼？拳擊或棒球「要贏唔難」，因為只係面對一個對手。在長跑上你若要贏過所有要面對的卻係數百個，得九十分鐘去練到個弱雞做到此點根本不切實際。故在長跑裡要贏過的係自己，就係以今日一個鐘完的，去超越昨日兩個鐘才搞定10K的我。 

 

就算同自己去鬥，都要去問贏或超越自己為什麼？肥妹天心（蔡裕彤）為追星到被好友出賣氣憤而跑係無聊，更叫唔知想點的是志行（胡子彤）的設定：被當係大雄型的廢青，卻又被「事業有成」的好友（強尼）講其係無父母無女無負擔又有樓握才是真正人生贏家，你話平凡人就是如此唔需渲染，但都係答唔到吃盡奶力跑10K叫為自己人生歡呼一次到底為來做乜。為陪伴恩師（譚耀文）說得勉強，因為溝唔到女（吳海昕）的無聊度同肥妹追星還真不相佰仲。 

 

故事寫唔出力仲有樣可「廉價」掩蓋，其實不應只跑10K，係應跑全馬42K，就係用長途路程風景，如青馬大橋，或萬宜水庫環湖路徑，用浩瀚風景頂替內容空洞。只係你仍安排在九龍城內，狹窄街道加上煩人的啦啦隊或急救員，只係加強悶局。你話要反思人生，卻係長程累透，兼同樣而默不作聲的跑手，跑到看到一眼無際的風景你才會有空間想透。現在你卻困在嘈吵的市區，再跑你仍唔會覺得自己跑出困局。 

 

講到溝唔到女，志行追唔上電車而自困在地產鋪，話繼續廢在這裡沒有甚麼唔好，吳說唔甘心困在此就一走了之：講得像時下  -  有本事的遠走高飛，沒本事的就似一味在跑，卻係叫不斷超越自己來自我慰藉，事實爛透的不是你而係你身處之地。明白何力恒寫出此無力之故，因為無望的係這地方卻又無膽講到明，於是就只好叫你跑，你跑得出去外面一片天還好，跑唔出去的也就別問太多只管跑就好。你話志行廢，其實照照鏡就知自己無咩資格咁彈。