2017年9月1日 星期五

《私人會所》 - 契弟的童話


《私人會所》(Members Only) 叫你諗返起錢國偉的「成日落老蘭」系列,若對比起錢,顏米羔你會覺得佢比錢更會呃人,卻又比錢更加誠實。


略睇電影海報,故事簡介,評級仲要上三,你以為今鋪實可以預備定廁紙除定褲。怎知原來上三之因,只在於開頭一幕吹奏、接著兩三幕只露背騎乘、再一幕之亂入的沖涼途中食自己,不但沒有露點,連股都朦朧叫你睇唔透,看得夠多的你又會怒罵無料到可言。錢國偉的雖然著衫做愛,卻也會美腿騷胸近鏡於你面前毫不吝嗇,二B的局限反見錢已盡哂力。

《私人會所》其實並不「私人」,內裡美女兼職陪坐,只係翻炒返《金雞》時代的夜總會,《一路向西》的莞式十八式還比它新奇過十幾倍巴仙,你想看現今上流社會玩意還不能靠這套入手。根本就掛羊頭賣狗肉,史提芬周、Milo、倫爺等人要相遇,邊度也可,正如經典愛情故事「我迷失在這場愛情遊戲」在老麥聚首一堂都可以。

故事主幹其實係兩階層的較量,下層的毒撚史提芬周和純情少女Milo,對上層的細價股莊家倫爺。一開始兩階層還可各自發展彼此無事,中後段才有所衝突。上層的倫爺要靠剝削下層獲利,也就會波及到下面的史提芬周和Milo。但下層也不是省油的燈,Milo趁早止蝕,史提芬周另搭上外援反咬一口。

人們都說故事似係爛尾,其實係你以為結局不外乎主角唔係突然省悟,也就係自食其果。接受不到第三種 – 主角純情不再沉淪成魔。這都唔係甚麼新奇,而係實體化七十年代電視劇《變色龍》最後一句:「我從來唔怕D契弟,因為我最契弟!」既然投身萬惡的資本主義世界,你就難以守身如玉,故此史提芬周和Milo就只能做契弟。相比《喜愛夜蒲3》最尾還要不切實際高呼「夜場尋真愛」,顏米羔比錢國偉,可算相當老實了。

奈何真實說話總是不好聽,尤其Milo像是《大時代》裡的周慧敏,傻氣女生沒做灰姑娘反做惡毒皇后,你會婉惜只因你沒看清楚這套就是三級:成人童話那用照顧你良善的心靈,反坦白俾你聽既然此社會是為一攤爛泥,你既要投入去卻想出於泥而不染那就簡直係妄想。還要問為何不再係《喜愛夜蒲》的才子佳人美滿大結局,明顯你就唔係位處一個能入場睇三級的年齡。


沒有留言:

張貼留言