《媽樣年華》- 起碼妳會反抗

 

胡翠兒的《媽樣年華》（Bird of Paradise）講一女去跳鋼管舞，其實這不新鮮，早些年曾翠珊的《非分熟女》都係咁講，只係女由「未夠熟」的蔡卓妍換作「真夠熟」的周家怡。

架構都係相近：由點解去跳的背景，到機緣巧合認識到鋼管舞，到跳時又係給個保守得很的男人看著佢又一時無法接受。只係蔡的性事不順、碰著吳慷仁「開竅」的這套沒講，因為既然標題係《媽》，周就扮一個「潔版」的老母，正如艾慕杜華電影：每個母親都係純潔正直。

只係這套似「潔」得過份：尤其陳湛文，扮的簡直係以為粵語殘片時以為女人無才就是德個種老套男人，張迪文去追女竟然整飯盒送上，睇過《向西聞記》骨與慾篇都知咁會嚇親人 – 講背景就係講得脫節到叫人起尷尬癌，相對於《非》叫去跳的理由更似夾硬搵來講，還要《非》裡鋼管舞亦未必最重要，但這裡卻就係重點：要講一個師奶去跳鋼管講跳得艱辛，所以夾硬叫周邊都老撚土，老到令一把年紦的金燕玲都相對先進。

同樣係叫人唔耐煩，但這套卻轉著佳境：陳撞破周跳鋼管後興師問罪，周當面大爆發離家出走 - 同樣都係喊濕紙巾怨父權，但這套好歹係女人會反抗，迫男人有反思。總好過妳心裡苦但妳不說，叫得男人無辜地唔知錯D乜。

雖《媽樣年華》講到底都係一套師奶劇，但觀感卻好過《非分熟女》，大概後者係二零一九年四月上畫，那時係大家以為有點左膠也沒不可。就係多年經歷以後，我們才學懂唔再去膠，重拾應有的常識，這正叫成長。