《寒戰1994》- 架空歷史你食我我食你

 

事隔十年，梁樂民獨自拍《寒戰1994》（Cold War 1994），以前就話過《寒》唔喺新嘢，這次亦然。 

 

其實這套更似《櫻之塔》港產電影版：警察為自身利益，偏來原則行事並內鬥。只係這套再加入英國佬、富商、黑幫等。有人話百二分鐘塞咁多搞到劇情似散，故此就王丹妮黑幫老丸當家、謝君豪白西裝、對警察皆深色 – 諗性別衣衫叫你易分清三邊人。 

 

但你睇得戲稍多，已知這套雖唔係簡單黑白對決，也其實只鬥獸棋般你食我我將你。且覺《寒》來到這套係想賣奇情內幕，唯梁以為的奇來到現在觀眾也只覺大驚小怪，正如老早《PTU》都教你警察唔係純白正義，到近年睇新聞都知「販冰兵」，豈會諗唔到警察會如此做事？ 

 

且梁不嬲都似太自己猜度：就算潘家自說犀利到港督府自出自入，當警務署長係自己馬仔，但你既然都叫呢棟「港督府」，傾大鑊嘢又唔叫埋港督出來？周文健以前咪就有套《港督最後一個保鑣》，怎麼沒提醒梁去安排這個「快撈波士」？就係只口講點係威係勢，但心水清點觀眾都感到唔現實，就如《赤道》咁就CID自把自為拆核彈。 

 

當然你可死撐電影擺明已平行時空，就係二零一七當選特首係男人，或唔想照現實係女人令大家諗起往後。可能梁樂民借電影讓大家逃避現實：若真係香港話事只係英國佬和幾個大有錢佬，頂多只係戲裡警匪槍戰或差D飛機撞冧機場，小市民只當睇戲。那似得現實真正話事的.......算了。