《他年她日》- 睇唔順的兩不像

小弟或許老了，見大家忙著圍插的也覺費時加一腳，例如龔兆平的《他年她日》（Measurein Love) 。 

 

這套見海報都知係賣許光漢袁澧林，你係唔妥他倆卻硬要入場怪得邊個？他倆在戲裡都出夠七八成時間，中後都草地對嘴再床上打曬車輪，點都唔係《我在這邊等你》的搵笨柒，難道你仲想趁有張床來場肉搏？別忘記人家可是文青女神呢，出得起錢叫佢除衫就唔會其他地方看似請多兩班臨記充撐下都沒錢吧。 

 

或小弟睇過更爛的愛情太多，君不見《看不見聽不見也愛你》就算有新木優子也叫你想奪門而出，這套相比卻沒搞出甚麼尷尬癌，頂多你咪叫袁講少一點沒有用的說話。當然龔度劇本係眼高手低，唔想只愛情故事就唔可以只純粹愛情關係，於是就《他年她日》。本來龔應集中講「重力牆」以及如何構成「長年區」「優日區」等，但龔似自覺唔係基斯杜化路蘭，也沒想到可如《星之聲》時的新海誠般簡單，於是加入許多階級意識：「長年區」被形容為「優日區」的殖民地，有法令禁止兩地人往還，「長年區」裡人常遭剝削，睇個醫生也要偷偷摸摸，醫療團隊「小鴿子」像不知好歹闖進加沙救人的左膠船群。 

 

當此龔又沒有解釋清楚這種社會情況，乜都講唔清顯得破破碎碎，觀眾或唔耐煩兩地人都沒有反抗意識。更難頂的是說好的我才不管你的時間，結果卻係要就妳待過三十日成為醫生，我就等妳三十年，等到最後人也唔需出現，讓妳留下自我感覺良好。 

 

難怪這女主角要袁澧林來當：她還是《白色女孩》時的她 - 傾左卻軟弱，就係沒革命意識，有的話她結尾就跳上船捉緊許光漢：「我也不管你我的時間。」但她最後就係要與現實妥協，叫自己不要戀愛腦還是要顧好現實。就係給你個虛假時空你卻唔可以浪漫到底，要依照現實你又唔去解釋到足，或者最應該批的唔係袁澧林，而係這兩不像的故事。