《空心人》- 水原彭發

 

有行家睇完彭發《空心人》(Reborn) 後大讚劇本很痴線的強，當然這引起旁人大窒你為張免費優先場飛咁掩住良心講嘢先係痴撚線。旁人會先入為主唔難理解：八十分鐘片長如同彭上次「多快好省」之杰作《手機見鬼》，仲要上次多女今次只有王敏奕同張兆輝對到底，這就連「多」都欠奉，卻另多了一漸偷工減料味。

 

小弟一直祟尚實踐係驗證真理唯一標準，還是搵個早場平平地睇左佢，起碼自信沒有欠著誰才評：今次彭都係會「省」，卻又唔係無道理，或自知擺唔出視覺上會嚇得著人的，那不如索性把「鬼」省掉。矛盾在他續用以前賣鬼方法：省掉鬼樣卻沒省聲音，廉價的恐怖音效仍為播而播咁徘徊，彭仍未掌握到甚麼叫不寒而憟。

 

你說就因為省了很多，所以彭就可全力於劇本上。唯你話強我卻唔見得很強，因為想講道理很淺易道出：人總係偏聽忠言逆耳，只會相信自己想相信的 - 由只聽網上的偏方，到認定一個公仔係離世至親的附身。 只係對比以往，彭沒太多說教訓人，最終似見你繼續沉淪卻同情道未必壞事，或者彭有過這種苦才曉莫亂勸他人善，反正你成年人，該否找麻醉劑係你自己決定，如此我亦無謂怪責。

 

但見彭講極就這麼多，只算係一家人版《消失的愛人》。你叫我再想一點，或就見最後場景在海心公園，日光日白扯唔上甚麼鬼怪，諗起My little airport同地名歌，講「島上面有好多巨型嘅怪石 / 啲人話啲怪石好靈 / 拜過佢嘅情侶 / 最終都會白頭到老 / 但點解 點解最後我無？」若張就如那六十八歲老而清醒的阿伯，他也會怒吼最後那句。只係張覺做人唔駛咁清醒，於是信靠妻兒在旁怪石真好靈。正如到今時今日，這個叫由治及興的時代，只要你自信樂觀，你就會如睇到公仔係真人咁睇到帶來的好處。

 

看來彭發有過的經歷，似係入贅一日本人家，那家人還要姓水原。