《看我今天怎麼說》- 一個種族的誕生？

 

黃修平的《看我今天怎麼說》 (The way we talk)，叫人疑惑的是開頭鍾雪瑩當起人工耳窩大使在演講，說可以當回一個正常人，游學修聽（看）罷怒得推到座椅，用手語怒吼：「我以聾人為榮！」 

 

你說游的憤怒有啥難理解：夾硬用口說話的聾人，表現實像弱智人仕說話般滑稽，只係黃唔駛加插有觀眾忍俊不禁暗暗訕笑的樣子，因為鍾已扮到就如一隻小丑：那管有否逗到你笑，但也就只討好你而做，你唔做或做唔到就「唔正常」，難怪會惹起怒火。 

 

那就當係意氣之言，認真計較你仍會問聾怎會係榮耀？你當聾人活在自己舒適區，聽障就聽不到助聽器或外頭世界的雜音，用手語比勉強發聲去溝通來得舒坦。只係無論你想唔想改變修補，聽障始終係缺陷。就係吳祉昊向游提議用「聾人」作賣點，游卻說唔想用「聾」去博同情，「你忘記講過以聾人為榮嗎？」唔係忘記，係他心底也難認同這句。 

 

黃似乎想問：手語算唔算一種語言，聾人算唔算一個族群？ 

 

若語言為指溝通用的信號系統，那手語當然算係。但二零一零年前聾人學校卻不承認手語為語言，迫令聾人學生學習唇語和「正常人」發音。其稱幫助聾人融入社會，但做法又似某些国家迫令學生放棄自己母語，改用那国的主流語言。你說當係社會的懶政而已，問題係擺出來那老師兇狠忟憎的模樣，你總會把問題想得嚴重。

 

「聾」就算係缺乏卻也是一種特徵，用來標籤分別一圈子人的特徵：游看似沒有聽力健全的朋友，與其朋輩亦多是自己圈子；鍾開頭被游說是八婆，亦被其他聾人白眼，只因她公開聲言自己想做「正常人」，就係排除「聾」，因此其他聾人就覺得非我族裔。 

 

金馬獎給了鍾影后，卻沒給影帝游。或係鍾係弱質纖纖地自我啟蒙，聽上來人畜無害。游卻係早就知曉並年少氣盛，有自尊並想把自尊推己及人 - 講得像多年前某地厚天高的小伙，唯他今日已消聲匿跡，又沒人敢問他是否健在。

 

台灣人或怕你鋒芒太露招禍上身，今次失落起碼保你還有下次，這算是台灣的人情味吧。