《墮胎師》- 港版鬼子母神還是孫悟空

 

見陳果、白靈、墮胎三樣野，你實以為《墮胎師》(The Abortionist) 係《三更2》〈餃子〉之後續，卻又沒有上三，表面原因係一百一十五分片長，真拍著墜胎過程只五分鐘，且唔會直影著血淋淋的胚胎，更加唔會叫你食落肚。

其實《墮》唔係〈餃〉的繼承，反係《細路祥》的復刻：這回白靈年紀老了一截，但心智反年輕大段 - 珍姐經驗老到，卻個性單純，被鄧月平呃細路咁呃，面對伍詠詩反叛女兒kiki束手無策，在她身旁穿插著學生妹、南亞街坊、修女校長等高高低低各式各樣，春秧街砵蘭街其實相差唔大，也就係童心看世情；只係相對《細》係金珠穿貫，《墮》的故事主幹較強：似係現代「鬼子母神」- 同樣殺害眾多嬰兒以供養自己女兒，叫神不悅於是令其kiki出走作施罰，珍不斷向神懺悔，神比佛祖更會開玩笑，叫kiki回來又送多個胎，叫你怎唔信真有聖靈感孕。但正如白痴都誤打誤撞上天堂，珍手術前擺回滿檯神佛，老毛英女皇瑪利亞共聚一檯，未必求哂三個保祐，反係嚇到三個都推卸呢單野唔係我跟開，從而有走棧穿過。

 

如《細》般又係成長故事，只係細路祥只能目睹，珍姐已成人才能學曉歷練。在香港做神唔難，只要你意識到所有神佛都係《大佛普拉斯》裡那種，就係殺人狂都好意思吃你香火；聲稱教友會想騙你財還好意思話你比她更污穢、嫌棄你殺生的女兒最後不斷打落自己肚子，這城市的道德正如《鬼同你住》講既法律可以改來改去，只因神都係真有事時冇能佛用，掌握這點你自立鬼子母神又得，做孫悟空遊走亦得。

 

只係《墮胎師》或係陳果最後一次咁看人間：廿三條過後，孫悟空都被戴上緊箍咒。就係我都要說話慎重：剛才講既殺人狂，你就當我講緊英女皇。