《但願人長久》- 壓抑

 

祝紫嫣的《但願人長久》（Fly Me to the Moon），監製係關錦鵬，因而會聯想到他的《愈快樂愈墮落》。 

  

兩套都壓抑情感：《愈》係男與男和男之間都不敢坦言鍾意對方，《但》係林子圓 (祝紫嫣/謝咏欣/許可兒) 不願表露自己始終最喜歡父親林覺民 (吳慷仁) - 某程度這套似《孤味》的女兒視覺版：去剖析一個一無是處的男人怎討得女兒歡心，表面答得簡單卻令人猜疑 - 盡力對女兒好關心她，那管是偷東西還是把梗有的錢買開心樂園餐。吳或係一種解答，卻又係一種穿崩：只有台灣男人才可以溫柔而不猥褻，湖南人你怎想像他裝得出？ 

  

但兩套都壓抑想探討的問題：《愈》係一九九七前的焦慮，《但》故事起點亦於九七，卻係問身份認同。相比《愈》只最尾話一九八四年九月似有賊入過屋攞走好多野但又留低好多無用嘢，《但》算問得明顯：子圓子缺 (袁澧林/許恩怡/彭頌晴) 常猜疑自己算唔算香港人，但肯定係怕被當係大陸人 – 為何又要睇返吳慷仁：正如誰想有個爛泥吸毒老豆招人話柄，林很是識趣唔會當街招認免女兒難堪。或者該搵鄭少秋，就係丁蟹般才會厚臉皮當街話我點都係你老豆，話雖未必要畫公仔畫出腸。 

 

成年後的子缺因參與社運近要入花廳，其母 (周琳) 呻她如同老豆，子圓係駁兩者怎能混為一談，但臉色又戚戚然：《中英街一號》疑把六七暴動和現代社運混淆，《但》也採這手段，叫你該體諒你老豆的無奈，如是者也似叫你別在意本來就是從那裡來。但《但願人長久》始終壓抑著想探討，因為如何唔違心又唔招惹麻煩的答案實太難。你問小弟可如何答？或可擺出偉大領袖毛主席語錄 - 世間沒有無緣無故的愛，正好他是湖南人。