《月光之下》- 就係要你死：社會的心底

 

石井裕也的《月光之下》(The Moon) ，就名字你以為係仿《白日之下》，只對比場景就知石井會輸頭陣：企理的療養院，一出來迎接你係笑面盈盈的二階堂當美，你怎說服起碼香港觀眾內裡係慘絕人寰？何況療養院員工對殘障者所謂施暴，宮澤理惠質問點解要咁做時，員工答大家都係咁做啦 – 就係反問得咁有限資源你仲想我點做？就係睇左《白日》會諗到這根本係社會默許，只肯付出雞碎，人家自然懶政。 

 

另邊你又覺宮澤同小田切讓兩夫妻講得有點多，二階堂愈來憤世嫉俗，不自覺早就離開療養院，聯同磯村勇斗四人共聚，又東拉西扯到三一一，你會覺石井又係衰貪心坐這山望那山，但重點實慢慢移向磯村，原來石井彷的唔係《白日》，而係《守護天使的失格》。 

 

石井似比《守護》更激：那套還只覺得你在世令大家都辛苦還不如送你一程；這套卻嚷大家都想你死，只係這社會虛偽沒講出聲，正如宮澤再懷孕時一開始就想到墮胎，療養院把不受控的患者困在黑房：簡單粗暴只因社會不願付更多資源協助應對。只要你收埋得妥當，怎樣所為皆得社會默許。 

 

石井沒講清楚，日本職場係講終身制，以致令人唔明磯村的偏激：一開始還滿懷理想，理想破滅想離開又難以做到，他自覺和殘障者一樣都陷入大監獄。問題係你憑自己主觀認定你沒靈魂，對社會沒用就擅定你生死，這是比《守護》更不堪，係赤裸裸的欺凌。儘管係社會心底所想，但唔要得就係唔要得。 

 

或社會真正想講：只想你唔作為我的負累，你的存在價值其實與我無關唔需計較。似乎要待到資源到科技豐足的未來，那就係烏托邦世界。難怪石井裕也最後只讓宮澤理惠小田切讓兩口子得到解決，四十多個殘障人卻唔好意思被解決。