《填詞L》- 可憐的夢想

 

黃綺琳的自傳作，《填詞L》(The Lyricist Wannabe) 說她曾經又起又伏的填詞人之夢，最終總算聽到自己作品出街，心滿意足就完結這場夢。早些年你話教訓年輕別發太多春秋大夢也無不可，只係今時今日美麗新香港，尤其戲裡活生生講出香港係懲罰夢想之地，你就要為黃擔心：散佈悲觀有機被當軟對抗。若改口話旨在反省再教導年青如何追逐夢想，那黃的過往該如何解讀？ 

  

所謂叫填詞而唔係作詞人，係因為必須先有歌，才可以填詞配合：一早認定詞只用來配搭，只用來給你首歌錦上添花。為何不能先有詞後才編曲去配？《但願人長久》豈會係蘇軾聽住歌來配？你說羅穎詩（鍾雪瑩飾）就只想填詞，沒想過當詩人。其實詩人沒有更高層次，許鞍華《詩》裡更有嚷香港沒多那個人會自命詩人。但當詩人卻不用依附音樂能自立自處，你只想填詞就要等待人們給音樂你去配上詞句，你的夢想一開頭係點都要受制外人。 

  

羅說想靠做填詞人去搵食，教她填詞的魯永康 (朱栢康飾) 笑窒做填詞人係搵唔到食，羅卻沒有及早省悟，又設了另一局限限死自己：你只為兩餐就要一味順從他人，絞盡腦汁度出的只係老闆唔岩聽就被一野拋棄，你亦不敢聲張。最後你聽到便利店播出自己填詞的歌，你才醒悟自己夢想只係自己填的詞能出街給他人聽到。其實還不如一開始就清高，不求賺錢只在討論區刊歌詞，當興趣而唔係正職你還來得自在，更係給人窒你努力六年都沒成就時，你還真可輕鬆回我邊有努力過，而唔係低頭慚愧。 

  

其實想問：羅只想填詞，但有冇想過填甚麼詞？她對自己作品有沒有想法？還是只「祈求主撚鳩」般貪好玩，於是就聽那首歌就想那句詞般無所謂。你嚷早話填詞人唔係詩人，卻就暴露你只想說話卻沒想過說甚麼話，難怪說句話都要受制其他。你怨香港係個抹殺夢想的地方，實一開始你設定你夢想係可憐的，係只會被受制而不能自處的。 

 

隱約記起韓麗珠在陳耀成紀錄片《名字的玫瑰 - 董啟章地圖》裡講文人就係為寫而寫，沒任何得著都會繼續寫。若果羅穎詩或黃綺琳不求糊口，堅持填自己想填的詞，來到今日結局或不一樣？你提醒小弟今日係講句話都要考慮有否煽動軟對抗，所謂不一樣可能正另一種。以此看黃似追悔一個時代，那時只要把你夢想和搵食脫勾，你的夢想豈會被他人抺殺？ 但就算黃有時光機回到過去，她也未必提醒得起自己，只因搵食係核心價值改不了，唔係做咩話要走得更遠改叫《填詞L》，而唔堅持叫「填詞撚」？