本來想速看村上春樹那六篇短故才評，但諗落又似不必，皮亞科德 (Pierre Földes) 參考的該唔止那六篇，就係內裡一隻貓被叫為渡邊 -《挪威的森林》之主角。
《隨盲柳入眠的女人》(Blind
Willow, Sleeping Woman) 說是劇情，還不如說是解剖村上春樹的論文：背景係三一一大地震後東京，故事主幹分三條：面臨被裁老婆走佬的小村、自覺人到中年一冇是處卻被大青蛙叫去保衛東京的片桐、出走後的小村妻子。
三人故事皆呈散，三一一也只停留於講下，皮亞似著重於人物及其身邊零碎細節，這些都似係由村上歷來作抽絲剝繭而出。
村上係現代主義，故對一切懷疑：青蛙理應係片桐的幻想，卻竟會有個律師走來拜託他叫青蛙別再搞他客人，似故意搞到疑幻疑真。但青蛙始終是他的潛意識 -人根底有英雄主義作祟，但總係會被埋沒：青蛙戰鬥後爆破變出一堆蜈蚣，片桐由那場惡夢夢醒後換來升職，這卻係正式埋葬其英雄之心 - 若換係佢被裁走失業，他反可能豁出去救東京，正如埼玉都係失業，才去每天俯臥橕仰臥起坐下蹲一百次兼十公里長跑練到頭變禿而成一拳超人。
小村另面睇係叫會男觀眾羨慕：明明沒啥長處卻偶有艷福，唔係一到異地就有女人投懷送抱，就係鄰家少女也會借故親近。性在村上小說常有，如《挪威的森林》會被當黃色小說，其實村上視性事如食飯，女人偏要訂間時鐘酒店給小村，小村面對態度就如順應少女邀請入其花園作客般why not。
你覺得村上開放，相對卻沒寫甚麼刻骨銘心：只因其人多是無腳雀仔 - 就如小村同事託其帶去北海道交給其妹小盒，係不會為其帶來麻煩，只係他睇唔透究竟是啥，後才聽說是裝著空虛 - 每樣每人都係存疑，既然自己都不可信，又豈會輕信別人，故此每人都係過客，學懂這種心態，才不會纏繞那人那事。就係小村老婆及其貓出走，他也懶得去搵由他去。
小村妻子講起以前向餐廳老闆許下願望，但究竟願望是甚麼卻沒有講明：你納悶咁講來做乜，但小村妻又係一重反映 - 每人都係一座孤島，偶然你都渴望另有人坐船靠近，但拜託你還是適當時候識趣離去，我只係想你明白我而不是纏繞著我，就係我講明我許甚麼願又如何？你都係只質疑我為何只許這種願，你明白就早知我係連許個願都沒自信罷。
沒有留言:
張貼留言