《燈火闌珊》- 俹簁的霓虹之死

 

曾憲寧的《燈火闌珊》（A Light Never Goes Out）係好講「傳統」：既講霓虹燈，又強調一個舊詞：俹簁。 

俹簁者，指作事苟且而不精細（詹憲慈著《廣州語本字》卷二十三），聽到此詞已係十一年前彭浩翔的《低俗喜劇》，仲要那時仍會扮後生竹星妹的薛凱琪會聽做「奶西」。明明此詞就快失傳，今日卻又會被翻炒出來，話當學徒的Leo (周漢寧) 做事俹簁，江美香（張艾嘉）會回窒楊彩虹（蔡思韵）：「你話佢（Leo）做嘢俹簁咁你又請佢？」其實呢個Leo點俹簁法？就係做文員打文件時打錯字，但佢本來唔係只光管學徒咩？ 

 

諷刺係呢套無故數算年青人，卻真俹簁既就係本身劇本：開頭彩虹話俾美香聽工場早已關閉左十年，而這個Leo彈出時，仲以為佢係玩探廢兼想乘機呃美香錢，你以為佢解釋清楚卻係愈講愈亂：楊燦鑣（任達華）究竟幾時掛掉、幾時沒再做霓虹燈實沒講得清；所謂恩愛的楊氏夫婦實係隔膜得可以，老婆竟似幾不聞不問老公盤生意，就係佢收了徒弟都懞然不知......你話就係專注霓虹燈所以少理故事破碎，但正如你只憑人地打錯下字就咬定人地乜都俹簁，觀眾都可以窒話你所謂專心只係稍好過《斷網》的完全無料扮四條者。 

 

你或會話小弟曾講過有些瑕疵似用左轉移視線，尤其係不能說太白的寓言：電影開頭有些叫人不喜 - 接受不了丈夫逝去的美香，直頭係黃真真《消失的愛人》個種沉淪幻想無建樹，連同霓虹燈就係又一件只會想當年；Leo同竟B來B去唔識叫阿哥的梁雍婷雖係煩膠，但好歹令電影起返生氣，就係會令美香勇於爬上招牌抵抗：「你話我僭建，你條法例先係僭建架！」滿街霓虹燈原就係香港標誌，同樣都因一件沒人認同之法而沒落，就算女人都會Mark哥上身慨嘆：「咁靚嘅野，一下就無晒，真係有D 唔抵。」

 

但妳的激烈就只爬上那霓虹燈一下，最後還是規規矩矩，依你所罵是僭建的法律去做。因為妳自知唔係Mark哥，只求拿拿聲完你亡夫所願，沒有要拿返失去既野的鬥志，於是只要面前既燈一著就可，重要硬給你似未滿師的徒弟畢業袍，似趕人走而唔係令他承襲下去。點解美麗會一下變灰塵？未必只因被一種蠻力摧毀，更致命係原應堅持下去的，只抱著一下光輝就好的心態。