《給十九歲的我》- 「八婆」張婉婷

 

睇《給十九歲的我》(To My Nineteen-Year-Old Self) 約三分一到，已閃起個念頭：假若這改張經緯去拍會點？或該諗得更有趣係：張婉婷去拍《音樂人生》又會係點？可能比緯更易拍唔成，唔係婷早早放棄，反而係佢固執追著，迫到黃家正㩒低攝影機向其怒吼：「八婆！你好撚煩呀！」 

  

這亦解釋了為何中二三時那群女學生始紛紛厭倦被其拍攝，二零一四年更躲避鏡頭：最大原因係張婉婷似足食飽無事做只顧八卦的師奶，佢最常向學生問點解這點解那，中一時小女生天真無邪仲可以當玩咁應酬佢，中二三時十四五歲人正值反叛期，就覺得眼前呢件阿毛仲煩過佢地阿媽。那個會溝仔的MK妹阿佘，或者會走到鏡頭後窒佢：「拜託唔好成日審犯咁問我地野好冇，你知唔知我玩APP遇著呢D仔我實一句唔該掃走架！」 

  

張還真夠八且貪，見英華學生妹一個接連問一個，時令人眼亂分不到誰還誰，理想應只跟兩三個：阿佘較會叫人注視，因佢係「問題少女」- 張毫不客氣拍佢流連西九、曠課、在外拍廣告、食煙等，這些換轉另間學校或見怪不怪，只係她打破給外人以為這間名校盡是乖乖女之印象。張有本事入到其家拍到其背後，或應問得更加多，尤其學校由半山搬到深水埗，鏡頭若跟住阿佘唔止到西九，還會穿過鴨寮街至大南街，可睇埋究竟社會會否改變一個人，尤其阿佘係一群「公主」中最會嘗人間煙火，雖然拍著少女的家庭頂多中產，沒有名門世家，即沒所謂貴族。 

 

其實大家都會錯重點，原本英華校舍才該是這紀錄片主角，奈何她是最備受冷落。大家都只顧看旗袍裙少女，只係少女沒個特別秀色可餐，於是又睇上記錄過的三時間：二零一二、一四、一九年。從中一個叫Madam - 從小立志當警察的女生另又會叫大家注意：其二零一四對雨革看法，以及後來當上副領袖生，像村上龍小說 《69》 裡一個向搞出校園封鎖的主角咆哮，指責他毀壞校譽的模範生。Madam到二零一九年卻放棄當警察，說是抵受不了同學的壓力，但言談係不甘要放棄多年的夢想，感覺Madam唔止說這麼多，但張似要保護她沒登出。記起《69》那模範生，最後係加入了赤軍並遭逮捕。 

 

你話我指張婉婷正八婆根本唔岩：真正八婆係擅加自己諗法指點解江山，你可以覺得張係煩，但她頂多只係問，係不去修飾記錄眼前所見到。只係她忠實地做個紀錄片導演，你又質疑佢唔就係英華校友嗎？佢自己對母校真只係旁觀？所以佢就不停地問，問校長健康、問學妹生活如何、問學校幾時重建完成......

 

《音樂人生》或係張婉婷拍唔來，因黃家正或會寸佢既事關佢撚事；《給十九歲的我》才是張拍的東西，畢竟英華就係關佢事。