今年幾套農曆新年上畫的戲中，《超神經械劫案下》（Everything Under Control）係最少人評，就算有評大多係交低兩字：爛片，就沒其他。「傳統」賀歲片係最易滋生爛片，只因百業尤其娛樂多於此時休市，為防人們無聊到想去自殺，於是造些更無聊當有趣，為叫你除去死念矣，正如十年前谷德昭的《神奇俠侶》。
只係多年疫情，只聽到因疫症而逝，卻未嘗有人會因連戲都沒得看萬念俱灰下自殺，因此縱容你拍爛的門已再沒有。況且這是新晉應智贇的第二套，咁快就要借機求其呃飯食，我都唔忍心諗到你咁可悲。
當應係想認真去拍，就算如此人們都以認真心態挑剔你。大家都知笑片一要素係正常環境唔正常或唔正常環境去正常：正如開頭奮身保安係威係勢好比警察，正常環境卻未到太唔正常，就只覺你刻意玩過分浪漫，係沒段堪稱抵死過癮。
而你係認真，那就唔甘於無無聊聊以博一笑：照返上次《深宵閃避球》，應還真喜歡比擬人生態度 - 張敬軒係被歲月磨蝕老屎忽、魏浚笙係初出茅廬空抱理想戇直男、王菀之係城府深，會偏差但強調原則底線。只係一來張太青靚白淨，係四十卻沒老屎忽的味道，二來三人縱有性格卻沒有影響故事。就結尾就係亂彈河童年獸女財神來接近埋尾，又返到亂膠咁來賀年片，想幫口諗你點認真都係沒法。
總之應智贇搞出來的未算最爛片，只係一盆大盆菜，多餸卻沒款味道突出。講真拍出好戲難拍爛片卻更難，難在就算羅守耀都唔會豁出自認拍爛。何況這只係你電影生涯第二套，咁快自暴自棄做咩呢？
沒有留言:
張貼留言