總覺得西川美和今次係比上兩套失手，敗在她要描述東京。
西川之前的都只限個人，《東京蒼穹下》 (Under the Open Sky) 就無可避免要講埋身後的城市，弊在要話東京並非冷漠無情，於是諸多造作失真：開頭帶歧視眼光的店長 (六角精児)，你發個脾氣就一百八十度大轉當你知己，似碰著人家玻璃心要立即露出胸部來道歉般可笑。如同樓下嘈生哂的無賴隻秋隻，你竟要先擺好姿勢，好在之後你還識二話不說一拳打過去 – 你假假地都係過黑幫，就唔好唔流暢得過《三五成群》的大王。
到最後就有點意思，三上正夫
(役所廣司) 明明之前好勇鬥狠，最後眼見同事欺負弱智員工，竟嘻嘻哈哈附和過去。其實講得正路，正如遊牧民族轉農耕後也就戰鬥力銳減。話雖都係欺善怕惡，你夠惡還可橫行一陣子，只係社會只懶文明而不需蠻力去事倍功半，你唔想再被隔離，就要接受這個社會把你磨蝕。
西川根本唔使幫東京講好說話，可仿石井裕也《東京夜空最深藍》：其實它如《大佛普拉斯》般本是無言 - 二千萬中就算你殺過人，你都唔值得被留意。所以市政府社工 (北村有起哉) 最合乎現實：你都唔係邊個咪因循苟且；電視台散仔記者 (仲野太賀) 想搵題材寫小說，係有目的也就說得過去；話當釋囚擔保人作興趣的退休律師 (橋爪功) 已似係吹水唔抺嘴。東京根本唔需懶好人，冷漠卻係一致地待你也叫公道。你夾硬俾幾個好人出來，就係建一座波將金村，無謂。
《漫長的藉口》正係諷扮好人去應酬社會目光，無奈西川美和延續不了這諷刺。本來鏡頭聚焦役所廣司，如何在這木人巷都市內碰撞求存就好看。奈何這東京卻好人太多，你只要甘願躺平，竟還舒坦過露宿深水埗街頭，簡直痴線。最後散仔記者決意寫三上故事，叫人質疑有甚麼好寫？當然你會話一個自以為不可一世的前黑幫大佬，遭東京這大怪物馴服，又算是一變態版愛的教育。
沒有留言:
張貼留言