《金都》 - 婚姻還有自由？

黃綺琳的《金都》(My Prince Edward) 有點叫人意外：論那棟大廈比想像中少，講失蹤了的大陸人楊樹偉 (金楷傑) 又比預期為多。

無論張莉芳 (鄧麗欣) 返的婚紗鋪、還是殷俊榮 (朱栢康) 的婚攝工作室，都係表面拍著而沒細緻討論其工作，當然你話《金都》只係意像，始終都係問婚姻是甚麼。

原本婚姻係指兩個人為組織家庭而建立約定，但正如道德會時而世易而變質，一紙契約亦被僭建很多：婚紗、婚攝、酒席、禮金等等原與兩個人未必相干的。且黃想的主題似係錢鍾書講的「城外的人想進去，城裡的人想出來。」：殷似無時無刻都要緊貼著張，住到返工同在金都，張稍遠離殷也狂發短訊給她，就算明知係假，殷也極介懷楊這個人 - 對殷而言張似是他的附屬品，婚姻到此竟似份奴隸約，係用來確認張係屬於他。你會問甚麼年代呀仲講奴隸？係呀就係廿一世紀，但假若我們的政制還是十九世紀都不如，不懂政治的平民仲身處十八世紀有咩出奇？

咁睇既話張莉芳根本就唔會想結婚：當年為了自由生活先同楊樹偉假結婚。擺多篇幅在楊就係用來諷刺：楊唔係一般大陸人，似係有家底的文青，唔諗住來港做蝗，而係借路去美國，講明要奔向自由 - 未曾擁有自由的大陸人，才會珍惜並拼命爭取自由。反而受慣自由的港人，卻時而會捨棄自由，正如難得擺脫家庭的張，三年後又會甘作殷的附屬。

結局有夠玩味：這個楊樹偉真唔似大陸人，說因要和女友安定成家而放棄，其實係佢有廉恥 - 就知道同是中國人的香港人有自由都唔懂珍惜，比他到了美國都唔會領略到自由的意義。正如張莉芳為擺脫殷俊榮，竟到了個唔講自由的國度，卻當在二丁目般悠然吃著麵懶理訊息轟炸，這叫是結了婚也可自由。黃綺琳在諷香港人想要的自由其實很簡單：偶然讓他們暢遊異國放心吃喝就夠。

只係黃綺琳勢估唔到，這套戲上正場之時，香港人連暢遊異國再找寄托的門都沒有了。