《P風暴》 - 我覺得呢套戲相當有嫌疑

唔好俾我講中，最貪的可能正是林德祿的「陰陽廉系列」。

講老廉正好有條罪可來比喻小弟的懷疑 - 公職人員收入不相稱，就如某些情形與你身份不對稱：睇埋麥兆輝的《廉政風雲 煙幕》，人家七成文戲，咁先符合老廉係一班文官。你頓時會想這個姓林的唔似係好大喜功，卻唔識寫文戲咁簡單。

「陰陽廉」集集都劇情單薄，但竟然長開長有，算近年港產片的一道奇葩。玩到《P風暴》 (P STORM)，大膽假設若有人藉開戲洗錢的話，今集正有好多痕跡值得注意。

愈新一集「陰陽廉」似愈很捨得花錢，來到這套，一些只出幾個鏡頭的小角，都要用上有名有目的人，起碼都艾威廖啟智黃光亮，他們片酬會同是但搵個臨記不相百仲？若你如小弟會追哂咁多套「陰陽廉」，你會發現如石修在《S》先俾人拉左，今集又會做懲教署長？陳靜係《Z》度服侍富豪，卻又係《S》度做張智霖個妹，今集竟又變做張繼聰條女？相比古天樂張智霖林家棟咁多集坐不改名行不改姓，懶理你會覺得媽我好亂，都要夾硬用返某一班人，可能就係要送錢給某間藝員公司。

從來「陰陽廉」都係鬥誰更弱智，今集除了周秀娜係安全屋打電話暴露位置，或譚耀文的真柒碌跌鎖匙。更該注意的係林峯演的大奸角狂燥唔講道理到毫無道理：要搞掂周秀娜可以靜雞雞地做，但他卻要大搖大擺 - 首先大班人當街恐嚇，跟住就出埋槍戰，最後用埋直升機差點撞向大佛，仲要藍幕貼得假到突。似係亂搵藉口造大場面大龍鳳，叫人大大疊科水落去。

戴返頭盔，一切都係小弟猜測，林德祿的金主真如Tommy Wiseau般有一大把銀紙攞去燒我都吹佢唔漲。但我覺得若「陰陽廉」玩到最後一個字母，大可就講有人借拍爛戲來洗錢，當然還要睇那時會唔會有人良心發現。