《入鐵籠》 - 小朋友齊打架

或係適逢電影節，陳翊恆的新作《入鐵籠》 (We Are Legends) 來得沒啥聲氣。講拳講MMA近年都有兩三套，陳要突圍而出也該很難。更甚者就算係依據真人真事，陳的鋪排卻又叫人看不順眼。

為何一個人上擂臺，被打到口腫臉腫，也要拼盡爭勝？只因為有個背後，驅使他要打就一定要贏：《激戰》或《百元之戀》係廢或作孽太多藉上臺去洗禮，《打擂台》則係講魂講鬥志。而《入鐵籠》係點玩架？開場不久即係招積 (馬志威) 寸柒柒揚言即將輕易打低對手，一臉狂莽自大，看得觀眾都反期望佢會輸一大鑊。

你話招積自大係緣自他孤兒出身的自卑，想在擂台上爭口氣：但擰轉就係他白鴿眼做人 - 既睇低對手，又對打黑市拳的細佬電兔 (林耀聲)「恨鐵不成鋼」，在頭腦簡單的觀眾眼中，黑拳和正規擂台格鬥咪都係打低人叫贏，比誰名不正言不順只係計較金門還是肛門出來的無聊。持人比人睇死人之態，唔係盲毛市井師奶就係腦袋未生好的細路，叫人要同情你甚麼？

話對手陳樂風在台上侮辱人，唔好意思，簡介上咁寫在戲裡卻完全沒這回事。陳反是戲裡較穩重的，看著招積或其拳館師弟似一班狂燥症衝過來，只得無奈應對。同樣無奈的係觀眾：所謂贏不到不甘心，看上來只係個小氣到家的小朋友，輸左係度發脾四，贏就給你明日扮哂野。講真唔係拳拳到肉的場面可搭夠，根本睇到招積被打低就可離場走人，你班小朋友贏唔贏到？我唔知唔想知呀。

你或會指電影叫人提不起勁，因陳翊恆不欲把憤怒帶進電影裡：招積上檯前會祈禱，但他都係得不到神的保佑，唔係神無用反是祂旨意 - 早講明狂莽自大必沒好下場。「打拳唔係為報仇」更是把聖經教悔白講出來，只係本來就小學雞意氣之爭，還好意思講甚麼報仇？陳如《第六誡》般想拿聖經訓人，卻又講得無力，結果係唔講野當MMA紀錄片還好，出聲就一班小朋友齊打架，叫人搖頭。