《無邪之境》- 本能界線

 

小弟之前曾與其他人激辯過劇透問題，自己曾舉影評一功能係觀後檢討，尤其開放式結尾之故，你唔「劇透」，就未必能指明討論目標。濱口龍介《無邪之境》(Evil Does Not Exist) 是為一例。

 

濱口這回又強化了他的現代主義，睇內容簡介還以為會俗套肥皂劇：開發商Playmode簡直大魔頭，從而巧等村民拼命抗爭云云。但在簡介會上，兩Playmode職員拿著粗疏之計劃書，無奈應對村民，眼看計劃書被連珠炮轟，臉色似回應：「搵食者......我想架？」職員回東京近要回嗆老細：「個計劃根本就唔撚work！」這老細竟還會裝斯文 - 公司職員或至城市人都在竭力抑壓自己情緒，想裝出自己根本唔係壞人。濱口或說這才是人的現實反應，《一念無明》裡都講過做仆街係唔容易，職員想輕鬆打份工，老細想輕鬆搵快錢，僅此而已，人總怠惰會捨易取難。

 

且這些按簡介理應只係故事之起，但你睇到兩Playmode職員駕車回村，電影時間進度已到片長四分三：你以為係承其實已係轉。合或結束係巧女兒花子失蹤，尋獲花子時其凝望受傷的小鹿，像《燃冬》裡周冬雨望著熊。男職員欲營救卻被巧擊倒在地，巧抱起被鹿擊到生死未卜的花子到叢林中，男職員起來欲追上卻不支倒地 - 你質為何結局如此牛馬不相及，但其實鹿係隱隱貫穿：林裡小鹿屍體、巧向Playmode職員講其營地正係鹿的路徑、討論鹿何時會襲擊人。

 

海報標題打「鹿死誰手」，中半箭的鹿係受槍傷，點都人類所為。只係人類打獵就一定錯？打獵本義只為取得食物，這與奈良食慣人類給的鹿餅，因沒得食而襲擊人類道理相近。電影名寫明《無邪之境》，似就係唔想先入為主定誰善誰惡：所謂水向低流，上流有義務確保所作不會為下流帶來災害之道理，係生活積聚而唔係一出娘胎就曉，Playmode計劃粗疏，但村民挑剔之語氣，亦似老屎忽針對後生唔識趣，沒誰比誰更高尚；自然要生長生存，人類豈何不是？彼此都係出於本能。結局似講人與自然之界，越界造成衝突，與正邪無關，像花子被村長勸不要進入叢林她還是進去，亦如小鹿靠近民居被中半箭，係無可奈何相害相殺，故還是彼此尊重界線。但到結束才開始討論，你或覺得傾得太急促。