《新活日常》- 咁係因為你樂觀

 

雲溫達斯來到東京，《新活日常》(Perfect Days) 拍役所廣司洗廁所，你或會挑剔一樣：太做戲了吧。

 

你要小弟解釋點謂之做戲：就好像廣告般，清潔工大清早見晨光現會微笑，表現迎接美好的一天。洗廁所時會刷得一絲不苟，只因知道鏡頭就在他旁邊，的確電影多用近鏡捕捉役所。他起床噴花、在屋旁售賣機買咖啡、駕車去洗廁所、途中播卡式錄音帶、午膳時用菲林相機拍樹、收工去浴場淋浴、再去地下街攤檔晚膳 - 這樣共重覆至少三次，這像《爆機自由仁》(Free Guy) 裡的NPC，他生活偶有改變都係旁人引致：如柄本時生的廢青同事、或即興吻向他的山田葵、又或突離家出走投向他的侄女中野有紗。旁人才像真玩家，役所卻像本無AI，日日依同一模式運作，沒有想過改變。

 

你說役所生活本來沒有甚麼唔妥當，其簡直就如《白塔之光》裡的老文青，誰說清潔工唔可以讀小說聽音樂玩攝影？只要你唔嫖賭飲吹慣就必有這閒錢，生活選擇而已。我所指的唔像真係指他竟唔會《窄路微塵》裡張繼聰忙完後嘆氣，會慨歎自己咁勞碌為乜。你指小弟曾指《窄》的口吻像嫌棄，現在《新活》在展現匠人精神你又嫌似做戲，你還真的相當難服侍。要公允再給個「真」例子，那就係《東京夜空最深藍》- 一切都不置可否，唔會熱情也唔需悲觀。

 

你說小弟算漏一樣：年齡 - 張繼聰或石橋靜河池松壯亮，在戲裡都只係三四十，這都係自感還有一口氣改變奈何搵唔到突破口，對身處工作生活只好無奈接受。役所沒講清楚，照現實推斷就是年近七十：生理上已欠精力、心理上多重風浪已嘗過，現在只想平靜，只要穩定生活就會滿足。以現在潮語去解：你會為做清潔而歎氣只因係你悲觀，你樂觀就會睇到做匠人的好處。

 

但始終役所已係七十，檯下未過四十觀眾就未必能心同感受。對了，小弟曾講過日本男人與《德州巴黎》裡的父親完全兩碼子回事，現在雲溫達斯到來，他還真沒有就地翻拍《德州》。只因他也年近八十，也沒有精力駕車一走了之，叫役所廣司就地樂觀做匠人，才是他現在的心境。