《白塔之光》- 無影塔下歲月靜好

 

張律的《白塔之光》(The Shadowless Tower) 表面睇為一個老北京文青日記，更似係劉以鬯著但黃國兆導的《酒徒》：這個辛柏青 (飾谷文通) 還真會叫人啤一聲 - 就算被載綠也艷福不淺，有黃堯 (飾歐陽文慧) 痴過來，還會無端被看鋪小妹說俊到似坂本龍一，令人不禁神仙B上身：「俊？邊撚度俊呀？睇過！」 

 

就算這個谷文通唔像劉先生一味自暴自棄，但他亦似自嘆人到中年高不成低不就，只寫食評無力作詩：文人似多迷信文窮後工，就如《苦役列車》裡北町貫多到臨尾近一無所有時才憤起作書，或如食指到自以為要永遠離開才爆出《這是四點零八分的北京》。谷是甚麼情況？自住還可讓個單位收租，女兒可以假借姐姐免去操勞，根本就係單身貴族，起碼遠不是住不起北京的經濟難民，表面煩在頂多係認唔認返自幼離開的老父，真正煩惱就係欠了寫詩動力。已當不起學生妹的黃堯雖還精靈，但要做起別人的繆思也有斷距離。 

 

你咬牙問歐陽其實看中谷甚麼？讚他不油膩真夠充分？他們初次飲杯的酒吧，頭頂牌子寫著是日放映李滄東《燃燒》（《燒失樂園》）- 唔係日記就一定現實，也可以現代主義。眼前見到的也可疑幻疑真：既然會猜疑谷兩父子有否重逢對話，你都可質疑歐陽對谷其實只是貪好玩。白塔連在其之下走過的也會無影，自己會不禁懷疑是否實際存在世間。 

 

你會窒《白塔之光》若旨在北京文青的生活際遇，還不如叫黃堯擔正？只係這個谷文通係生於七十年代，連帶食指顧城的詩、父親當年真相、無影的白塔 – 老文青安逸卻係朦朧無法確定，因世事往往初一十五不一。作為四十不惑，理應無法煩惱歲月靜好反窒礙你後工，反正隨時也會緣份到。