《蒼鷺與少年》- 遺囑

 

先旨聲明：你話我無的放矢也好，但我肯定唔會歧視宮崎駿，很簡單我的畫功連他千份一都唔到，我何德何能去歧視他？何況真正大師，豈會理會我此等閒人之閒語，你能十年磨劍出鞘，就無人敢窒你有心無力。 

 

宮崎今次沒講明封筆，但有感此很大機為其最後作：別怪小弟黑心，即使年到百歲愈見普遍，唯如陳木勝錢國偉周海媚英年早逝大有人在，更難保年到八十的宮崎突駕鶴西去。《蒼鷺與少年》(The Boy and the Hero) 似係一份遺囑：一係趁終結透露心底所想，再而交代遺產。 

 

表面《蒼》就如《千與千尋》的尋覓成長故事，亦似《少年Pi的奇幻漂流》：真人與蒼鷺，也似Pi對老虎 - 蒼鷺不斷向真人提其老母來刺激他，而《蒼》係宮崎的半自傳，即真人的戀母情結就係宮崎的心底。真人起初對蒼鷺厭惡，亦如Pi對老虎，就係 面對自己心魔。其實真人的「老虎」唔止蒼鷺，還有其繼母夏子：當得知夏子內心其實最討厭他時，他卻從此接受到這繼母：他因戀母而抗拒夏子，但同時卻對夏子照顧他而愧疚，就係知道夏子也抗拒他時才醒悟不必自責 - 人要勉強自己成為聖人，而勉強自己把慾望埋藏深底很無謂，反正大限將至，無須過份掩飾：正如會認尤其男人總希望在女人胸脯尋求溫暖，於是《風之谷》的娜烏西卡被設成巨乳。

 

真人的巫師曾舅公想真去承繼他疊石平衡「下界」，宮崎已擺明講到自己遺產該何去何從：真人決定係拒絕，他早指石塊帶有惡意 - 就算宮崎吾朗指駿作為爸爸零分，好歹他知道兒子只想做吾朗，而唔係宮崎駿二世，自己遺產對他係負累甚至咀咒，所以講明不用他去承繼，活出自己人生就好。誰如鸚鵡王般不知好歹搶作他的繼任也由他，反正也會自取其辱。

 

最後講明：我還真望我會搞錯，《蒼鷺與少年》唔會宮崎駿最後一部，唔係怕甚麼宮安法，而係聽到他離世我一定沒理由高興，正如我根本沒理由歧視佢那樣。