《白日青春》- 再投奔怒海

 

你問劉國瑞的《白日青春》（The Sunny Side of the Street）係現實主義作沒錯？我看電影似唔想講清楚時間：縱使開頭擺民建聯上檯指是當世，就算講陳白日 (黃秋生) 係偷渡落來仍沒感有甚麼出奇，但再話陳康 (周國賢) 係十一歲才到香港，當這個康三十多歲，推斷一下白日偷渡來港時間，你就質疑那時那會有人這樣偷渡來港？若劉唔係搞錯而係一種敘事手段，那就係現代主義。 

  

見故事簡介講難民，你見海報卻常只有秋生哥大頭，還以為比《芳寸之地》更似假關心。但睇落卻見電影實有兩線貫穿，一條白日，另一就係飾巴基小孩莫青春的林諾。莫線初段較淺，只因被其父Ahmed（潘文星飾）分薄，Ahmed逝後才見白日青春兩線交織。 

 

結局有點叫人愕然：「正常」該是警察趕到，還是白日勸服青春留下云云，或你覺又係那懶開放式 – 青春真能成功離港？唔會被太保出賣或水警截停還真唔知道。只想到這結局根本就係《投奔怒海》：睇返Ahmed –原為仗義律師遭迫害而流落香港壯志未酬，「我喺香港十年同坐監冇分別。」聽落就如：「越南人革命成功，我自己革命卻失敗。」故白日與青春，其實亦如芥川直見與阮琴娘 – 芥川此左仔以為協助越南革命，怎料卻建成一座大地獄；白日聽到Ahmed臨終前一句，故他助青春離開，唔止想贖撞斃他人，而係贖自己庸碌一生，促成身處之地變理想監獄之罪。 

 

或者劉該如《智齒》：換一下裝來強調這只係寓言，無奈「民建聯」、紅的、到Ahmed直講出香港，都指明此地是那處。為何投奔怒海？只因此地係讓你焚身的地獄。如此明目張膽唱衰香港故事，今天電檢懵盛盛讓它過，明日或會国安找上門，還真祝劉國瑞好運。