《斷網》- 黃慶勳失控了一切

 

《斷網》 (CYBERHEIST) 首映時得到幾乎所有在座影評人KOL等一致激烈回應，尤其見到郭富城更激讚他十年磨劍終突破《殺人犯》到達新高度。小弟起初難以置信一個細路女就咁講：「Daddy你係度做緊咩呀？」竟仲震撼過譚真一的：「我相信以你性格，娶個老婆一定好靚。」雖看後明白係兩回事：《殺》係一粒核彈一野爆，《斷》係滿佈地雷由爆到尾，爆到令人D有厭，就係「你係度做緊咩」大大話話都講左三四次。

 

在討論劇情如何「驚人」之前，或可問黃慶勳點解搞成咁？電影製作特輯裡黃述網絡保安唔係你想像咁安全，講得頭頭是道。但呈現出來就係個中學生都識窒：「你識條春咩！」睇返上次穩陣的《麥路人》，都有幕送藥俾阿媽竟要費氣從天台吊下。今次荒誕情節多如繁星，終合得出黃似有種廢老心態：望兩眼再加我以為便自持掌握世事懶做功課，流浪漢係望下就明白，於是網絡就照辦去望下公司個IT狗網絡技術員點做野就算，頂多叫埋胡子彤睇埋一份學下戲，於是咪撞哂版。

 

若此片拍在八十年代去想像二零二零，或可勉勉強強，至弊這是二零二二年去諗二零二三，於是黃所以為的網絡世界，同是但一個觀眾所諗的有很大討論空間：因要洗幾十億錢而玩冧哂成間銀行網絡，你不如搵張子強玩綁架大龍鳳重實際；小學生都識轉數快Payme等按個掣轉到錢時，都心諗你做乜轉筆錢要流哂汗去玩打字比賽；又話咩網絡世代，你俾個權限竟要寫紙入信封遞出房？你手握一張micsd卡犯罪証據，竟要親身行去差館而唔係電郵又好whatsapp又好傳過去？你個駭客技術真夠巴之閉：只係駭銀行結果玩到手機斷網地鐵停駛，就連離線的車cam也給你駭到。

 

黃仲要自以為的網絡世界都自相矛盾諸多甩漏：林家棟輕易埋到快撈波士身搞掂左佢，係咁易你又唔搵你老母又好一開頭隊冧佢先？你諗住叫你個AI機械人做駭伺服利器，喂你件所謂AI係只識叫人夠鐘食藥喳；明明你可以在明玩冧全香港網絡咁巴炮，做乜又要落到暗網去刮一個人？你唔去拜託警察去查？後部城城竟指令警察做野，任達華連講句：「阿sir做野唔駛你教。」去駁都冇。何況唔係美麗新香港嗎？把警察描得咁無能，咁都俾佢上畫？電檢人員瞓哂乎？

 

至於戲名《斷網》，大家更會大窒：「斷？邊撚度斷呀？睇過！」黃似乎記性欠佳，編故事時唔記得戲名，或定戲名時唔記得左故仔講乜。人人都話若要改個更貼切名，似叫「郭富城失去了一切」仲岩D，但我睇來卻似係黃慶勳失控了一切更岩聽，只因全套戲似冇邊忽在他控制範圍內 - 假如黃真係識電腦的話。