《流水落花》- 私心之必要

 

好人好事的電影總有個問題 - 把無私講到理所當然。正如某國以前宣揚開的英雄，說他做好事不留名，只係常有個攝影師跟住他走剛好拍下他事蹟而已 - 你信確係真人真事？ 

 

賈勝楓的《流水落花》（Lost Love）算睇得順眼，只因做對一樣，就係認人確有私心。 

 

點解做寄養家庭？直講當打份工有錢收，沒講出口係另找寄托轉移傷痛；丈夫何彬（陸駿光）出軌，爆一理由係妻子陳天美（鄭秀文）寧花心力在外人兒女都唔望多佢一眼，像幼稚小孩卻係直接表露 - 人有私心係自然唔需掩飾，因此唔需裝模作樣：煙癮起就出露台食、寂寞難耐就另搵伴、所以唔離婚只因要繼續做寄養都會講通。亦沒甚麼故作大義凜然：「人來架！你當佢係貨來轉來轉去？」等聽得出只因感情而直率。

 

你話九十分鐘實唔夠擺七個細路，似都用來襯托鄭秀文，但公允論每關係篇幅小但簡而精。較喜歡文森（黃梓樂）那段：天美陪他見完訓導後斥他為自己開句聲都唔懂去哼 - 道出人就算如何薄弱都要為自己爭氣，對比起另一套自以為家貧去偷竊並埋怨別人囤積，意識好得多。

 

雖話電影唔係完全沒造作，就係最後七個細路一字掛開，似沒必要；談善言亦只係由戴眼鏡變除下眼鏡，就係勸天美接受小花（吳祉嶠）被另家庭領養時，唔識無耐性拍枱回窒：「頂，人地出得起錢幫佢醫兔唇呀，識你咁耐，鬼唔知你老母那有錢呀！」既然早認人有私心，咁你都唔駛一直扮斯文下話。