《西遊伏妖篇》 - 不對你動心只係你來去太快

其實自己又唔算係周星馳粉絲，無太大意欲為他辯護，只係很奇怪有人看畢《西遊伏妖篇》(Journey To The West: The Demons Strike Back) 後又大罵中伏：小弟老早在《西遊 · 降魔篇》提過你星爺早就老了，佢有錢賺得再添食佢的事，但你冇些心理準備就入場後又呻俾人呃就係你犯賤。

講真若你新年只求看個精彩的畫面一樂，徐克還算唔會讓你失望：電影裡的CG，最起碼沙僧中毒變成的大魚，起碼都係徐一貫的「收貨標準」。

只係數封廿蚊利是才能夾出一張戲飛，大家沒那麼易滿足係正常：星爺原本的大賣點就係無厘頭，看三藏悟空八戒沙僧四師徒間的無大無細，即使明顯跟著鄭保瑞續集也是找蜘蛛白骨精較量，觀眾看前部仍會覺得星爺係如何令他們估佢唔到。

但星爺硬要一百零八分鐘內埋單，於是後部全玩自爆：先係小善爆實為白骨精，再係九宮真人殺出爆這都是他設的局，接著又係三藏爆一早看穿他們的計謀於是和悟空將計就計，這些都重覆《殺人犯》的錯誤 - 一切都用自話自說來作結就把原本好玩的都變不好玩。

三藏四師徒外，林允扮的白骨精本來也是一要角：《美人魚》後再被星爺叫來扮純情少女，白骨精真愛上三藏，就算三藏自認只是個凡人唔係聖人，但也抱歉沒對她動心。明顯唔係放唔低段小姐，而係同白骨精「相逢恨晚」：小善要到電影中後段才冒出，跟住同三藏一陣子卿卿我我，之後唔駛講就係白骨精九宮真人急不及待彈哂出來。星爺或原本想帶出初戀難忘初次心痛，但竟沒想到如叮杯麵快的愛情係難叫人咀嚼到味道。

林允這小妮子還有機會的，反正上次你們都罵過一次，罵完今次卻又再罵過第二次，星爺早就看透你班人就是愛犯賤，於是過多一兩年也是會再來多集乜乜篇的。