《那年夏天你去了哪裏》 – 羅守耀改名換姓返左來？

顏卓靈扮精靈小妮子其實都扮唔到多幾年，趁這幾年尚有人氣也該試轉戲路。只是要轉還是要找岩導演，否則後果難料，正如找了周顯揚的譚真一。

《那年夏天你去了哪裏》 (Cherry Returns) 還真會叫你記起《殺人犯》：顏卓靈真會叫你期待佢幾時同林家棟爆句：「我相信以你性格聚個老婆一定好靚。」既然問你去邊一度，今次唔再玩不老症，好歹都玩下外星人，點知諗到痴左線都只係個連培養場面都冇個的殺手育成計劃，拜託你這個叫周隼的不要這麼懶惰好不好？

唔知是否不幸中之大幸，周隼或根本沒啥意欲把顏卓靈煉成椎名英姬，故此顏未崩壞也不見突出，只係件日日口黑面黑的MK妹。反而周邊人物相對更出眾 – 溺愛細女仇視大女的老母、對細女又恨又內疚的姐姐、指責兄長敗壞家聲自己也和秘書搭上的父親、記恨弟弟到喪心病狂的伯父。可能顏真正的作用係挑 出一個家庭裡各樣的醜惡，本來編排得好去挑動虛偽也耐看。

弊在周隼的導技還真像某位「名導演」：林家棟明明香港警察，竟代了洛杉磯警察去落人家地方案件口供、顏上門尋仇一野把女工從樓梯推落到撞裂牆身、林家棟和四個警察撞正伯父被擲落街到面前，竟鎮定到如同見亂拋垃圾、胡歌的伯父私生子在弒父前講的：「邊有親生老豆叫自己個仔殺細路。」、最後的林有理冇理撞車埋去埋單完左故事......根本係羅守耀先夠膽死搞出來的情節對白。

講真想像羅守耀要改名發電影夢都係亂噏廿四，正如明將都有捧場客，羅用返本名再加上電影的廣告語殺回家，你怎可否定這乃有另一鼓吸引人的殺氣？但總之，反正羅真係未有新作，太掛念羅氏cult味的，不妨看這周隼頂癮。若你係顏粉絲，咁不如你再睇多陣《狂舞派》先，除非你自問都會鍾意呢件黑面神顏卓靈。